ئیسرائیل هەڕەشەدەكات و سەرۆك وەزیرانەكەی دەڵێت، دوژمنەكەمان “ناكەس”ـە و 1000 كیلۆمەتریش دووربێت، جەرگبڕانە لێیدەدەین.
نەفتالی بینێت سەرۆك وەزیرانی ئیسرائیل، هەڕەشەی لەو لایەنانە كرد كە هێرشدەكەنەسەر ئیسرائیل و وتی، تەنها لەوانە نادەین كە پەلامارمان دەدەن، بەڵكو لەوانەش دەدەین كە دەیاننێرن.
وتەبێژێك بە ناوی بینێت ڕایگەیاند، “دوژمنەكەمان ناكەسە و مەرگخوازە، سڵناكاتەوە لە وێرانكردنی ژیانی هاوڵاتییانی ئیسرائیل، لەباتیی ئەوەی لێیانبگەڕێن ژیان و داهاتوویان بنیادبنێن. دەبێت دوژمنەكەمان باجی دژایەتیكردنی ئیسرائیل بدات، ئەگەر 1000 كیلۆمەتریش دووربێت لێیدەدەین”.
وتەبێژەكەی سەرۆك وەزیرانی ئیسرائیل بەبێ ئەوەی ناوی هیچ وڵات و گروپ و لایەنێك بدركێنێت، ئامادەیی وڵاتەكەی بۆ ڕووبەڕووبوونەوە نیشاندا و وتی، “ئێمە ئامادەین و مەشقپێكراوین بۆ لێدانی دوژمن بە شێوەیەكی توند و جەرگبڕانە”.
