وەزیری دەرەوەی ئێران رایگەیاند، ئیسرائیل مەترسی و هەڕەشەیە بۆسەر ئاسایشی ناوچەکە، هۆشداریشیدا بە ئیسرائیل لە دووبارە ئەنجامدانەوەی هێرش بۆسەر خاكی ئێران.
عەباس عەراقچی، وەزیری دەرەوەی ئێران لە میانی کۆنگرەیەکی رۆژنامەوانیدا بە توندی ئیدانەی هێرشە سەربازییەکەی ئیسرائیلی بۆسەر قەتەر کرد و ئیسرائیلیشی بە “گەورەترین هەڕەشە بۆسەر ئاشتی و سەقامگیری و ئاسایشی ناوچەکە” وەسفکرد.
عەراقچی لە درێژەی وتەکانیدا هۆشداریدایە ئیسرائیل لە دووبارەکردنەوەی هێرشەکانیان بۆسەر خاکی ئێران، داواشیکرد، وڵاتانی ئیسلامی هەڵوێستێكی یەكگرتوو بگرنەبەر بۆ رووبەڕووبوونەوەی سیاسەتە فراوانخوازییەکانی تەلئەبیب.
ئەو وەزیرەی ئێران ئەوەشی خستووەتەڕوو، وڵاتانی ئەوروپا لە رێگەی هەڕەشەکانیانەوە هیچ ئەنجامێك بەدەستناهێنن.
دەشڵێت، لەئێستادا ئاژانسی نێودەوڵەتیی وزەی ئەتۆم، دانی بە پێویستیی گرتنەبەری میکانیزمی نوێ بۆ هاوکاری لەگەڵ تاراندا ناوە، لە کۆتاییشدا رەخنەی لە ئەنجومەنی ئاسایشی نەتەوە یەکگرتووەکان گرت و وتی، “ئەنجومەنەکە رێگەچارە بۆ ناکۆکییەکان نادۆزێتەوە”.
