دەستپێشخەرییەكەی خستەڕوو
چێوەی هەماهەنگی داوای ڕێككەوتن لە لایەنە كوردییەكان دەكات

چێوەی هەماهەنگیی شیعەكان دەستپێشخەرییەكی بۆ كۆتاییهێنان بە قەیرانی پێكهێنانی حكومەتی نوێ خستەڕوو كە نۆ خاڵ لەخۆدەگرێت، دەربارەی سەرۆك كۆمار داوای ڕێكەوتن لە لایەنە كوردستانییەكان دەكات، سەبارەت بە سەرۆك وەزیرانیش جەختدەكاتەوە كە پێویستە مافی گەورەترین فراكسیۆن پارێزراو بێت.

لە دەستپێكیدا هاتووە، لە سۆنگەی هەستکردن بە بەرپرسیارێتیی شەرعی و ئەخلاقی، ئەو دەستپێشخەرییە نیشتمانییە گشتگیرە ڕادەگەیەنین، بۆ دەرچوون لە قەیرانی ئێستا و ئەو بنبەستە سیاسییەی بەمدواییانە دروستبووە.

لە خاڵی یەكەمی دەستپێشخەرییەكەدا چێوەی هەماهەنگی “بۆ ڕەچاوکردنی ماوەی دەستووریی و پاراستنی بەڕێوەچوونی پرۆسەی دیموکراسی” داوا لە سەرجەم لایەنەكان دەكات، لەسەر مێزی گفتوگۆ دابنیشن و گفتوگۆ لەسەر چارەسەرەکان بکەن، بەبێ هیچ مەرجێکی پێشوەخت، هەمووان بەرژەوەندیی نیشتمان و هاوڵاتییان لەبەرچاوبگرن.

خاڵی دووەمی دەستپێشخەرییەكە ڕوو لە لایەنە كوردستانییەكان و تایبەت بە پۆستی سەرۆك كۆمارە و تیایدا هاتووە، “پێویستە سەرۆککۆمار کەسێکی لێهاتوو و دڵسۆز و خاوەن مێژوو و ڕەفتاری چاک بێت. لەسەر پارتە کوردستانییەکان پێویستە هەوڵبدەن لێکتێبگەن و ڕێککەوتن لەسەر کەسێک بکەن، کە خاوەن ئەو خەسڵەتانە بێت”.

دەربارەی پۆستی سەرۆك وەزیرانیش لە خاڵی سێیەمدا جەخت لە پێویستی پارێزگاریكردن لە “مافی گەورەترین فراکسیۆن” دەكاتەوە و دەڵێت، ڕێککەوتن بکرێت لەسەر كاندیدی سەرۆک وەزیرانی داهاتوو، بەجۆرێك هێزە سیاسییە بەشداربووەکان لە حکومەت بەرپرسیارێتیی شکست، سەرکەوتن و لێپرسینەوە بگرنەئەستۆ. بەڵێن بدەن پشتوانی تەواوبن بەپێی بەرنامەی حکومی پەسەندکراو، ئەمەش لە کۆنگرەیەکی گشتی ڕابگەیەندرێت.

لە بەشێكی دیكەی دەستپێشخەرییەكەدا و بە ئامانجی دووركەوتنەوە لە “بنبەستی سیاسی” هێزەکانی چێوەی هەماهەنگی داوا لە پەرلەمانتارانی سەربەخۆ دەکەن، كاندیدێكی لێهاتوو، پاک، پەسەند و بێلایەن بۆ بەڕێوەبردنی وڵات لەم قۆناغە هەستیارەدا پێشكەشبكەن كە پشتیوانیی هەموو فراکسیۆنەکانی نێو گەورەترین فراکسیۆنی هەبێت.

لە خاڵی پێنجەمدا داواكراوە بابەتی هەرسێ سەرۆكایەتییەكە یەكلابكرێتەوە و سەرجەمیان بە یەك پاكێج تێبپەڕێندرێن، لەگەڵ ڕێككەوتن لەسەر ئەوەی “ڕەتکردنەوەی هەر كاندیدێكی پێکهاتەکان مانای بەریەککەوتن نییە لەگەڵ ئەو پێکهاتەیە، بەڵکو بواردانە لەبەردەم ئەو پێکهاتەیە تاوەکو بژاردەی دیکە پێشكەشبکات”.

چێوەی هەماهەنگی داوای دووركەوتنەوەش لە سیاسەتی “شكاندنی ئیرادە” دەكات و لە بەرامبەردا جەخت لەسەر پێویستی “نەرمی نواندن و سازشکردنی دوولایەنە” دەكاتەوە لەپێناو گەیشتن بە هاوبەشیی نیشتمانی و سیاسی لەگەڵ ڕەچاوكردنی قورسایی هەڵبژاردن.

لە خاڵی حەوتەمیشدا دووپاتیدەكاتەوە كە پێویستە “زۆرینەی دەسەڵاتدار، بەڵێن بدات ژینگەیەکی ئارام بۆ ئۆپۆزیسیۆنی پەرلەمانی فەراهەم دەکات، تاوەکو ڕۆڵی پەرلەمانی بگێڕێت و چاودێری کارەکانی حکومەت بکات و لێپرسینەوەی لەگەڵ بکات”.

بۆ جێبەجێكردنی هەنگاوەكانی دەستپێشخەرییەكە، چێوەی هەماهەنگی و لایەنە هاوپەیمانەكانی پێشنیاری پێكهێنانی لیژنەیەكی دانوستان دەكەن بۆ گفتوگۆ لەگەڵ هێز و لایەنەكانی دیكە.

لە خاڵی نۆیەم و كۆتاییشدا دەڵێت، “بژاردەی بەشداریکردن لە حکومەتی داهاتوو، یان بوونە ئۆپۆزیسیۆن، بژاردەیەکی کراوە و ڕەخساو بێت لە بەردەم هەمووان، بێ ئەوەی بەسەر هیچ لایەنێکدا بسەپێنرێت”.

جگە لەو خاڵانە دەستپێشخەرییەكە ژمارەیەك بڕگەی وەك پابەندبوون سەرجەم لایەنەكان دیاریكردووە، لەوانە، بەڵێن بدرێت پێداچوونەوە بکرێت بە هەموو گرێبەست و دامەزراندنەکان لە حکومەتی کاربەڕێکەری ڕۆژانەدا.

هەروەها، هەموارکردنی یاسای هەڵبژاردن، بەپێی بڕیاری دادگای فیدراڵی ژمارە 159 لە 2021/12/27 تایبەت بە پابەندکردنی ئەنجومەنی نوێنەران بە هەموارکردنی یاساکە و بەڵێندان بە گۆڕینی کادیرانی کۆمیسیۆن و دووبارە داڕشتنەوەی پەیکەر و هەڵبژاردن ئەنجومەنی کۆمیسیاران.

سەبارەت بە پەیوەندییەكانی حكومەتی ناوەند و حكومەتی هەرێمیش داوای پابەندبوون بە ڕێكخستنەوەی كراوە “بەشێوەیەک مافی هەمووان بپارێزێت و زۆر شەفاف بێت، هەروەها چارەسەری گونجاو بدۆزرێتەوە بۆ کێشە هەڵپەسێردراوەکانی سەرجەم دۆسیەکانی نێوانیان بەپێی دەستوور، وەک دەرکردنی یاسای نەوت و گازی فیدراڵی و چۆنییەتی بەڕێوەبردنی سامانی سروشتیی وڵات و پشتوانیی هێزەکانی پاسەوانی هەرێم و پێشمەرگە و پابەندبوون بە فەرماندەی گشتیی هێزە چەکدارەکانەوە”.

جگە لە چەند خاڵێكی دیكەی پەیوەست بە، دروستکردنی سندوق بۆ پشتیوانیکردن لەو پارێزگایانەی زیاتر هەژارن، بەڵێندان بە ڕەتكردنەوەی هەر هەوڵێك بۆ ئاساییكردنەوەی پەیوەندییەكان لەگەڵ ئیسرائیل، چالاککردنی دام و دەزگاکانی چاودێریی و پەرلەمانی و داڕشتنی بەرنامەی وەزاریی و بەرنامەی حکومی بۆ قۆناغی داهاتوو.

بابەتی پێشتر

ئەوروپا لە قەدەغەكردنی نەوتی ڕوسی نزیكدەبێتەوە

بابەتی دواتر

تەندروستیی سلێمانی: لە 24 كاتژمێردا 912 هاوڵاتی سەردانی نەخۆشخانەكانیان كردووە

بابەتی پەیوەندیدار
زیاتر ببینە

هەڵبژاردنەكەی عێراق دواخرا

ئەنجومەنی وەزیرانی عێراق ئەمڕۆ سێشەممە 19ی كانونی دووەم ڕایگەیاند، “هەڵبژاردنی پەرلەمانیی پێشوەختە دواخرا بۆ 10ی مانگی ئۆكتۆبەری داهاتوو.”…
Total
0
Share