ڕێكخراوێكی ناحكومی تایبەتمەند بە كاروباری تەكنەلۆجیای زانیاری ڕایدەگەیەنێت، ئاسایشی زۆرێك لە بنكەكانی سوپای عێراق لەبەردەم مەترسیدایە بەهۆی “خراپ بەكارهێنانی” زۆرێك لە ئەپلیكەیشنەكان لەوانەش (تیك تۆك).
سەنتەری میدیای ژمارەیی داوادەكات كە ڕێگە بەهیچ كارمەندێكی وەزارەتی بەرگری عێراقی نەدرێت ئەپلیكەیشتنی (تیك تۆك) بەكاربهێنێت و وێنە لەنێو شوێنە سەربازییەكانیاندا بگرن.
ڕێكخراوەكە ڕونیكردوەتەوە، “گروپە تیرۆرستییەكان” دەتوانن ئەو گرتە ڤیدیۆییانە بۆ ئەنجامدانی هێرش بۆ سەر هێزە سەربازییەكانی عێراق بەكاربهێنن، كە ئەمەش دەبێتە هۆی “ڕشتنی خوێن و گیان لەدەستدان”.
سەنتەری میدیای ژمارەیی دوپاتیشیدەكاتەوە، وێنەگرتنی سەربازێك بە جلی فەرمییەوە لە شوێنی ئەركە سەربازییەكەی پرسێكی دیكەیە و پێویستە بخرێتە ژێر چوارچێوەی دیسپلینی ئەمنی و سەربازییەوە.
ئەوەشی ئاشكراكردووە كە چەندین ئەژماری كارمەندانی سوپای عێراقی لەنێو ئەپلیكەیشنی تیك تۆك تۆماركردووە كە ژیانی ڕۆژانەیان لەنێو بنكە سەربازییەكاندا بە ڤیدیۆ بڵاودەكەنەوە.
