بەڕێوەبەرایەتیی پۆلیسی ڕاپەڕین، ڕاگەیەندراوێكی لەبارەی دۆسیەكەی سلێمان هەڵشۆیی و ژیانی ناوبراوەوە بڵاوكردەوە و ڕەتیكردەوە ناوبراو خۆكوژیی كردبێت و دەڵێت، “سەلامەتە”.
بەشی ڕاگەیاندن و پەیوەندییەکانی بەڕێوەبەرایەتیی پۆلیسی ڕاپەڕین لە ڕاگەیەندراوێكدا ڕایگەیاندووە، “لە سۆشیاڵ میدیا وابڵاوکراوەتەوە گوایە (سلێمان هەڵشۆیی) خۆی کوشتووە، بۆ ئەو مەبەستە لەلایەن (بەڕێوەبەری بەشی پۆلیسی گرتن و گواستنەوەی ڕاپەڕین)ی سەر بە بەڕێوەبەرایەتیمان دڵنیایی تەواوکرایەوە لە سەلامەتیی تۆمەتبار (سلێمان هەڵشۆیی) و هیچ هەوڵێکی نەداوە بۆ خۆکوشتن و زیانگەیاندن بە خۆی”.
جەختدەكاتەوە، “بەڕێوەبەرایەتیی پۆلیسی ڕاپەڕین ڕای گشتی لەوە دڵنیادەکاتەوە کە (سلێمان هەڵشۆیی) سەلامەتە و هیچ هەوڵێکیشی بۆ خۆکوشتن نەداوە. ئەو دەنگۆیانە مەرامێکیان لە پشتە بۆ بەلاڕێدابردنی ڕێڕەوی لێکۆڵینەوە. بۆیە بەڕێوەبەرایەتیمان ڕێکاری یاسایی لە دژی ئەو پەیج و ئەکاونتانە دەگرێتەبەر کە هەواڵی نادروستی لەم شێوەیە بڵاودەکەنەوە”.
لە كۆتایی ڕاگەیەندراوەكەدا هاتووە، “سلێمان هەڵشۆیی لە سەرەتای دەستگیرکردنییەوە بە بڕیاری بەڕێز دادوەر و بە ماددەی 456 لە یاسای سزادانی عێراقی ڕاگیراوە و تا ئێستاش لێکۆڵینەوە لە دۆسیەکەیدا دەکرێت و بەردەوامە”.
