پەرلەمانتارێكی فراكسیۆنی گۆڕان، ڕایدەگەیەنێت، دەستبەسەرداگرتنی ماددەی هۆشبەر بە تۆن ئاسایی نییە و هۆشداریش دەدات لە زیادبوونی باندەكانی ماددەی هۆشبەر و دەستگیركردنی تۆمەتباران.
دابان محەمەد، لە نووسینێكدا كە لە هەژماری تایبەتیی خۆی لە تۆڕی كۆمەڵایەتیی فەیسبووك بڵاویكردووەتەوە دەڵێت، “ھەواڵێکی بەڕێوەبەرایەتیی پۆلیسی ھەولێرم بەرچاوکەوت کە دەڵێت 1 تۆن و200 کیلۆ ماددەی ھۆشبەر لەناوبرا، یان پێشتریش بە پێنج ھەزار کیلۆ ماددەی ھۆشبەر دەستی بەسەردا گیراوە و لەناو براوە، لەم ھەفتەیەش کەسێک گیراوە کە کیلۆیەک تلیاکی لە پشتوێنەکەیدا ھەڵگرتبوو”.
بە وتەی ئەو پەرلەمانتارە، “(ترانزێتی تلیاک، لەپاڵ پانتۆڵ و دۆلار)) لە ھەرێمی کوردستان باسی زۆری لەسەر بوو، ئەمانە ئاسایی نین”.
پێشیوایە، “لەوەش خراپتر ئاماری ئەو کەسانەیە کە دەستگیردەکرێن، مانگانە نزیک دەبێتەوە لە 200 کەس بەھۆی بازرگانی و بەکارھێنانی ماددەی ھۆشبەر”.
پەرلەمانتارەكەی گۆڕان ئاشكراشیكردووە، “ئێستا گروپ و باندی زۆر و جۆرا و جۆر دروستبوون، کە بەرەنگاری دامودەزگا ئەمنیەکان دەبنەوە و بە چەکی جۆراوجۆر ڕووبەڕوویان دەبنەوە، تەنانەت حکومەت خۆی ڕووبەڕووبونەوەکانیان نمایش دەکات”.
