ئەمینداری گشتیی یەكگرتوو دەستێوەردانە دەرەكیەكان بە ڕێگر لەبەردەم چارەسەری كێشە ناوخۆییەكانی هەرێم و ڕێككەوتن لەگەڵ بەغداد ناودەبات.
سەلاحەدین بەهائەدین ئەمینداری گشتیی یەكگرتووی ئیسلامی كوردستان ڕایگەیاند، بەرپرسانی هەرێمی كوردستان دەستەوەستانن لە ئاست چارەسەری كێشە كەڵەكەبووەكان جا چ كێشەی سیاسی بێت یان ئابوری، دەستێوەردانە دەرەكیەكانیش ڕێگرە لەوەی كێشە ناوخۆییەكانی هەرێم چارەسەربكرێت یان لەگەڵ بەغداد ڕێككەوتن بكرێت.
وتیشی، “جیاوازییەكی زۆریش لەنێوان دەسەڵات و هاوڵاتیاندا دروست بووە كە دەسەڵات بەرپرسە لێی و بێباكە و نایەوێت جیاوازییەكان كەم بكاتەوە و كێشەكان چارەسەربكات”.
لێدوانەكەی ئەمینداری گشتیی یەكگرتوو لەكاتێكدایە سەرەڕای بڕیاری دادگای فیدڕاڵی و سووربوونی حكومەتی ناوەند لەسەر ڕادەستكردنی دۆسیەی نەوت و ئامادەییان بۆ ڕێككەوتن لەگەڵ هەرێم، بەرپرسانی پارتی وێرای شكستیان لە دۆسیەی نەوت، باس لە غازی سروشتی و هەوڵی هەناردەكردنی بۆ دەرەوە دەكەن.
لەكاتێكدا شاندی حكومەتی هەرێم بۆ تاوتوێكردنی بڕیارەكەی دادگا و ڕێككەوتن لەگەڵ وەزارەتی نەوت ڕوویان لە بەغداد كرد، سەرۆك وەزیرانی هەرێم بۆ تاوتوێكردنی هەناردەی غازی سروشتی و چەند پرسێكی دیكە دوو سەردانی بۆ توركیا و بەریتانیا ئەنجامدا.
