ڕێژەی 37%ی خوێندكارانی دواناوەندی لە ئەمریكا، دووچاری نەخۆشیی ئەقڵی بوون، هۆكارەكەش ئابوری و پەتای كۆرۆنایە.
ڕاپۆرتێك كە ناوەندی كۆنترۆڵكردنی نەخۆشییە گواستراوەكان لە ئەمریكا ئامادەیكردووە، كاریگەریی دۆخی ئابوری و لێكەوتەكانی بڵاوبوونەوەی پەتای كۆرۆنا لەسەر خوێندكارانی ئەمریكا ئاشكرادەكات كە دووچاری نەخۆشیی ئەقڵی و تەنگژەی دەروونی بوونەتەوە.
بەپێی ڕاپۆرتە بنكۆڵكارییەكە، بەهۆی بڵاوبوونەوەی پەتای كۆرۆنا و لێكەوتەكانییەوە، 44%ی خوێندكارانی قۆناغی دواناوەندی لە ئەمریكا دەڵێن، لە ماوەكانی كەرەنتینەدا ڕۆژانە هەستیان بە دڵتەنگی كردووە.
بەشێكی تری خوێندكارانی ئەمریكی كە 37%ی بەشداربووانی ڕاپۆرتەكە پێكدەهێنن، دانیان بەوەدا ناوە كە دووچاری دڵەڕاوكێ، نیگەرانی و خەمۆكی بوون.
جیاوازییەك كە ڕاپۆرتەكە ئاشكرایكردووە، لە ڕێژەی نێوان هەردوو ڕەگەزدایە، 49%ی كچان ئاشكرایانكردووە كە تەندروستیی ئەقڵییان دووچاری گرفت بووەتەوە، بەرامبەر بە 24%ی كوڕان كە دووچاری هەمان ئەو گرفتانە بوون.
