بەرەبەیانی ئەمڕۆ یەکشەممە ئاگر لە بەشێک لە کامپی ئاوارەکانی زاخۆ کەوتەوە، جگە لە زیانی ماددی چەند کەسێکیش برینداربوون.
پەیامنێری تۆڕی میدیایی ئێستا لە دهۆک گواستییەوە، ڕووداوی ئاگرکەوتنەوەکە لە کاتژمێر 1:30 خولەکی بەرەبەیاندا بووە، لە کاپمی چەمشکۆی ئاوارەکانی شەنگال کە کەوتووەتە سنووری ئیدارەی سەربەخۆی زاخۆ.
بەپێی زانیارییەکان بەهۆی ئاگرەکەوە سێ خێمەی ئاوارەکان بەتەواوی سوتاون و برینداریش لەناو ئاوارەکانی کامپەکەدا هەن.
لە ماوەی کەمتر لە مانگێکدا ئەوە سێیەم ڕووداوی ئاگرکەوتنەوەیە لە کامپی چەمشکۆی ئیدارەی زاخۆ، لە هەفتەی ڕابردوودا بەهۆی کەوتنەوەی ئاگر لە کامپەکە گەنجێک گیانیلەدەستدا.
