وەزیری دارایی عێراق ڕایدەگەیەنێت، ئەو ئاڵنگارییانەی دووچاری حكومەتی داهاتوو دەبنەوە بەهۆی یاسا و دامەزراوەكانی حكومەتەكانی پێشترەوەیە و دەڵێت، “لەگەڵ وەزارەتی گەنجینەی ئەمریكا هەماهەنگی دەكەین بۆ چارەسەركردنی دۆسیەی شتنەوەی پارە”.
عەلی عەلاوی، وەزیری دارایی عێراق لەگەڵ سندوقی دراوی نێودەوڵەتی لە واشنتن كۆبووە و ڕایگەیاند، ئەو ئاڵنگارییانەی دووچاری حكومەتی داهاتووی عێراق دەبنەوە بەهۆی یاسا و دامەزراوەكانی حكومەتەكانی پێشترەوەیە كە پێویستە سوود لە سەرچاوەكانی دیكەی داهات وەربگیرێت لە دوای نەوتەوە.
ئاماژەی بەوە كرد، سندوقی دراوی نێودەوڵەتیی پشتیوانیی سیاسەتە ئابوری و چاكسازییەكانی عێراقی كردووە چەند پڕۆژەیەكی بۆ باشكردنی دۆخی ئابوریی عێراق هەبووە.
وەزیری دارایی وتی، “لەگەڵ وەزارەتی گەنجینەی ئەمریكا هەماهەنگی بەردەواممان سەبارەت بە شتنەوەی ئەو پارانەی پەیوەندییان بەعێراقەوە هەیە و هەموو ڕێوشوێنێك دەگیرێنەبەر بۆ بەرگرتن لەو مەترسییانەی بەهۆی لێكەوتەكانی جەنگی نێوان ڕوسیا و ئۆكرانیاوە دێتە كایەوە.
