جێگری بەڕێوەبەری گشتیی فەرمانگەی تەندروستیی سێمانی ڕایدەگەیەنێت، وەزارەتی تەندروستی كاركردنی فەرمانبەری خۆبەخش بۆ تەندروستیی سلێمانی ڕەتدەكاتەوە و بۆ زۆنی ئەولا خەڵك بە لێشاو دادەمەزرێندرێن.
دكتۆر هێرش سەید سەلیم، جێگری بەڕێوەبەری گشتیی فەرمانگەی تەندروستیی سلێمانی ڕایگەیاند، دوو ڕوویی وەزارەتی تەندروستی و ئەنجومەنی وەزیرانی زۆنی زەرد لە سیاسەتكردن بەرامبەر دۆخی تەندروستی و كارمەندانی دانەمەزراوی ئەم زۆنە هەموو سنوورێكی ئەخلاقی تێپەڕاندووە.
بەرپرسەكەی تەندروستیی سلێمانی دەڵێت، “پێویستە وەزیری تەندروستی بێ سێ و دوو ڕوونكردنەوە بدات و پۆزش بۆ كارمەندانی دانەمەزراو و خۆبەخشی ئێرە بێنێتەوە لە كاتێكدا تەنانەت فەرمانی كاركردن بە خۆبەخشیش بۆ ئێمە ڕەتدەكاتەوە بە خشكەیی و بەبێ دەنگی لیستی دامەزراندن بۆ زۆنی ئیدارەی ئەولا ژێر بەژێرو لارە لار ڕادەگەیەنن”.
ئاشكرایكرد، كاتێك دێتە سەر قسە و باسی دوو ئیدارەیی هەموو ئۆباڵەكە دەخەنە سەر لایەنی دیكە، بەڵام ئێمە دەمێكە گوتومانە كە ئەوەی بەرامبەر ئێرە دەكرێت سزاو كێبڕكێ و باجی سیاسییە كە زەرەرمەندی سەرەكی تێیدا سلێمانییە.
جێگری بەڕێوەبەری تەندروستیی سلێمانی دەڵێت” دەرمان و پێداویستیی پزیشكی لە لێواری وشكبوونە و وەزیری تەندروستی لە چاوی سیاسەتی حزبەكەی دەیخاتە سەر نەبوونی پارەی نەختینە كە لەوانەیە بەشێكی ڕاست بێت، بەڵام بەشە هەرە گرنگەكەی وەزیر و وەزارەتی تەندروستییەو خەمساردن بەرامبەر ئیفلیجكردنی بەشێك لە جەستەی وەزارەتی تەندروستی كە ئەویش بەڕێوەبەرایەتیی گشتیی تەندروستی سلێمانییە”.
بەرپرسەكەی تەندروستیی سلێمانی پێیوایە، دامەزراندنی دەرچووانی بەشە تەندروستییەكان لە سلێمانی جیاوازیی ڕەنگ و دەنگ نییە لەچاو ئەوانەی زۆنەكەی ئەولا بە ئاشكرا پێمان دەڵێن بەڵێ جیاوازن و تا زەرد نەبن و پایزی خەزانتان نیشاننەدەن جارێكی دیكە لافی پێشەنگی تەندروستی وازلێبهنن، چونكە دەسەڵاتی دامەزراندن و هەستانەوەتان لای ئێمەیە تا سازش بۆ ئێمە نەكەن هیچ بەخۆتانەوە نابینن.
هێرش سەلیم دەڵێت، “سەیرە وەزارەتێك كە خزمەتگوزارییە و هەموو ئەركەكەی پاراستنی ژیانی هاوڵاتییانە بەبێ جیاوازی ڕەنگ و دەنگ و ئایین و ڕەگەز ، ئێستا جیاوازی لە دامەزراندن و گەشەسەندنی سەرچاوەی مرۆیی بەشێك لە هەرە گرنگترین و پێشەنگترینی دەزگاكانی دەكات بە ئامانجی زەقكردنەوەی هەستی جیاكاری و ناوچەگەری لەگەڵ ئەم زۆنە، بۆیە پێویستە بەرپرسانی ئەم زۆنە لە ئیدارەی حكومەتی هەرێم و جێگری سەرۆكی ئەنجومەنی وەزیران هەم بێدەنگی بشكێنن و هەم ئەم دۆخە ڕەتبكەنەوە”.
بەرپرسەكەی تەندروستی دەڵێت،”دەبێت لەهەمانكاتدا وەزارەتی تەندروستی یەكلایبكاتەوە ئایا سلێمانی و دەوروبەری بەشێك نین لە وەزارەتی تەندروستی بۆ ئەوەی ئێمەش بزاین كە ئایا مریشك لە هێلكەیە یان هێلكە لە مریشكە”.
