جێگری لێپرسراوی مەڵبەندی یەكێتی لە مەخمور ڕایدەگەیەنێت، ئەو هێزەی ئەمڕۆ لەناو قەزای مەخموردا بینراون سەر بە هێزەكانی ئاسایشی نەتەوەیی”الامن القومی”ن دەڵێت، “ئاسایشی قەزای مەخمور لەئەستۆی فرقەی 14ی سوپای عێراقدایە”.
ڕەشاد گەڵاڵی، جێگری لێپرسراوی مەڵبەندی یەكێتیی نیشتمانیی كوردستان لە قەزای مەخمور لە لێدوانێكدا بە تۆڕی میدیایی ئێستای ڕاگەیاند، ئەو هێزەی پاش نیوەڕۆی ئەمڕۆ شەممە لە قەزای مەخمور بینراون كە چەكی قورس و ئۆتۆمبێلی سەربازییان پێبووە سەر بە هێزەكانی ئاسایشی نەتەوەیی عێراقن كە بارەگاكەیان لە بینای كۆنی شارەوانی مەخموردایە.
ئاماژەی بەوەكرد، زۆرینەی هێزە عێراقییەكان لە سنووری قەزای مەخموردا هەن جگەلە هێزەكانی حەشدی شەعبی، بەڵام پاراستنی ئاسایشی قەزاكە لە ئەستۆی فرقەی 14ی سوپای عێراقدایە.
ئەمڕۆ لە تۆڕە كۆمەڵایەتییەكان وێنەی ژمارەیەك ئۆتۆمبێلی سەربازی بڵاوكراوەتەوە، كە باسلەوەدەكرێت هێزیكی دژە تیرۆری عێراقن و گەیشتوونەتە قەزای مەخمور.
