ئەڵمانیا جۆرێك تانك دەدات بە ئۆكرانیا كە خۆی بەكاریناهێنێت و ماوەی 12 ساڵە بەهۆی خراپی و كۆنییەكەیەوە خانەنشینیكردووە.
بڕیارە لە چەند هەفتەی داهاتوودا ئەڵمانیا 50 تانكی لیۆپارد – 1 بدات بە ئۆكرانیا، ” Handelsblatt”ی ئەڵمانی وردەكاریی بابەتەكە و تایبەتمەندییەكانی ئەو جۆرە تانكەی بڵاوكردووەتەوە و دەركەوتووە بەهۆی خراپییەكەیەوە، خوودی سوپای ئەڵمانیا ئەو جۆرە تانكە بەكارناهێنێت.
بەپێی وتەی شارەزایانی سەربازی، تانكی لیۆپارد كۆن و لاوازە و چیتر بە كەڵكی جەنگ و شەڕی ئەم سەردەمە نایەت، چونكە پلێتەكەی تەنكە و بەرگەی مووشەك و چەكی دژەتانك ناگرێت، لەوانە ئەو مووشەكانەی سوپای ڕوسیا بەكاریاندەهێنێت.
شارەزایان ڕایانگەیاندووە، سوپای ئەڵمانیا 45 ساڵ ئەو تانكانەی بەكارهێناوە و ماوەی 12 ساڵە تانكی لیۆپاردی خانەنشینكردووە. هەروەك تایبەتمەندییەكانیان ئاشكراكردووە كە لاوازن و بەهۆیانەوە تانكەكە ڕووبەڕووی ڕەخنە بووەتەوە، لەوانە تەنكیی پلێتە گولـلەنەبڕەكەی كە بەشی پێشەوەی 70 ملیمەترە و تەنیشتەكانی تانكەكە 60 ملیمەتر و بەشی دواوەشی تەنها 10 ملیمەتر ئەستوورە.
ئەوان دەڵێن، لیۆپارد – 1 تەنانەت بە چەكە دژەتانكە كۆنەكانیش تێكدەشكێندرێت، لە كاتێكدا ئێستا سوپای ڕوسیا مووشەكی كۆرنێت بۆ تێكشكاندنی تانكەكانی سوپای ئۆكرانیا بەكاردەهێنێت كە چەكێكی بەهێزی دژەتانكە و دەتوانێت بە ئاسانی تانكە ئەڵمانییەكە تێكبشكێنێت.
