حكومەتی عێراق پێشبینیدەكات ڕێژەی هەژاری بۆ 25% بەرزببێتەوە.
دوایین ئاماری ڕێژەی هەژاری كە لە عێراقدا كراوە، ئامارەكەی ساڵی 2019یە كە 22.5%ی خەڵكی عێراقی لە ڕیزی هەژارەكاندا پۆلێنكردبوو، بەڵام بەپێی نوێترین داتاكانی وەزارەتی پلاندانان، ئێستا ڕێژەكە بەرزترە و پێشبینیدەكرێت بگاتە 25%.
باسم عەبدلزەهرە هنداوی وتەبێژی وەزارەتی پلاندانانی عێراق دەڵێت، “بەمنزیكانە وەزارەتەكە ئامارێكی نوێ بۆ ئاشكراكردنی ڕێژەی هەژاری لە عێراق دەكات، چونكە پێش بڵاوبوونەوەی پەتای كۆرۆنا ڕێژەكە 22.5% بوو، بەڵام بەهۆی لێكەوتەكانی پەتاكە و دۆخی خۆراكی جیهانییەوە ڕێژەكە گۆڕاوە”.
وتەبێژی وەزارەتی پلاندانان ڕایگەیاند، پێشبینیدەكرێت ئێستا ڕێژەكە لەنێوان 22 بۆ 25% بێت و “حكومەت ڕێوشوێنی گرتووەتەبەر بۆ ڕێگریكردن لە زیاتر بەرزبوونەوەی، لەڕێگەی زیادكردنی بەشەخۆراكی مانگانە و پشتیوانیكردنی تۆڕی پاراستنی كۆمەڵایەتی و دابەشكردنی مووچەكانیان بە بەردەوامی”.
