دووەم ڕۆژە تارانی پایتەختی ئێران بووەتە پیسترین شاری جیهان لەڕووی هەواوە.
پۆلێنكردنەكە ناوەندی توێژینەوەكانی وزە و هەوای پاك (ئای كیو ئیەر) كردوویەتی و دەڵێت، “ئەمڕۆ شەممە نیشانەی پیسبوونی هەوای تاران زیاتر لە 178 پلەیە”. هەندێك كاتیش لە هەندێك شوێنی تاراندا گەیشتووەتە 288 پلە، وەك دەستەی كەشناسیی ئێران ئاشكرایكردووە.
بەپێی پۆلێنبەندییەكەی ناوەندی توێژینەوەكانی وزە و هەوای پاك كە دامەزراوەیەكی جیهانییە، ماوەی دوو ڕۆژە تاران وەك پیسترین شاری جیهان لەڕووی هەواوە دەستنیشاندەكرێت و بەدوایدا شارەكانی شیانگ مای و بانكۆك لە تایلەند، كەراچی لە پاكستان و شنیانگ لە چین دێن كە پلەكانی پیسبوونی هەوایان لەنێوان 152 بۆ 156دا بوون.
دەستەی كەشناسیی ئێران دەڵێت، “پیسبوونی هەوا بەهۆی شەپۆلی خۆڵبارینەوەیە و 28 پارێزگای ئێرانی گرتووەتەوە و تا سبەی یەكشەممە بەردەوام دەبێت”.
محەمەد مەهدی میرزایی سەرۆكی كۆمپانیای چاودێریكردنی كوالێتیی هەوا لە تاران ڕایگەیاند، شەپۆلێكی تری خۆڵبارین لە خۆرئاوای ئێرانەوە ڕووی لە تاران كردووە و پلەی پیسبوونی هەوای گەیاندووەتە 288 پلە، بەڵام موحسین مەنسوڕی پارێزگاری تاران دەڵێت، “ئەمڕۆ كەشوهەوای تاران بەرەو باشبوون دەڕوات و پیسبوونی هەوا بۆ ژێر 200 پلە دابەزیوە”.
