سەرۆكی بانكی ناوەندیی لوبنان ئیفلاسكردنی بانكەكەیان ڕەتدەكاتەوە و دەڵێت، بەردەوامە لەو ڕۆڵەی پێیدراوە.
ڕیاز سەلامە سەرۆکی بانکی ناوەندیی لوبنان ڕایگەیاند، بانکەکە هێشتا ئەو ڕۆڵە دەگێڕێت کە بەپێی یاسا پێیدراوە و ئەوەی لەبارەی ئیفلاسکردنییەوە دەوترێت ڕاست نییە.
ڕوونیشیکردەوە، “سەرباری ئەو زیانانەی بەر ئابوریی لوبنان کەوتوون، لە ئێستادا بەپێی پلانێکی حکومەتی لوبنان و بە هەماهەنگی لەگەڵ سندووقی دراوی نێودەوڵەتیدا کار بۆ چارەسەرکردنیان دەکرێت، بانکی لوبنان هێشتا ئەو ڕۆڵە دەگێڕێت کە بەپێی ماددەی 70ی یاسای نەختینە و بەسلفەکردن پێیدراوە و بەردەوامیش دەبێت”.
پاش ئەوەی سەعادە ئەلشامی جێگری سەرۆکی حکومەتی لوبنان لە دیدارێکی تەلەفزیۆنیدا ڕایگەیاندبوو، “دەوڵەت و بانکی لوبنان ئیفلاسیان کردووە و زیانەکە ڕوویداوە”، مشتومڕێکی بەرفراوان لەو وڵاتەدا كەوتەوە و دواتریش هیچ ڕوونکردنەوەیەکی فەرمی لەو بارەیەوە، نە لەلایەن حکومەت و نە لە سەرۆکایەتیی کۆماریشەوە نەدرا.
