بەپێی هەواڵێکی ئاژانسی سانای سەربە حکومەتی سوریا، کاروانێکی هاوکاریی سەربازی لۆجستیکی ئەمریکی لە عێراقەوە چووەتە ناو ڕۆژئاوای کوردستانەوە.
بەپێی زانیارییەکانی ئاژانسە سورییەکە لە 14 ی شوبات بڵاویکردووەتەوە، کاروانە سەربازییەکەی ئەمریکا لە دەروازە نا فەرمییەکانی نێوان عێراق و سوریاوە چووەتە خاکی ئەو وڵاتەوە و بەرەو پارێزگای دیرەزور بەڕێکەوتوون.
پارێزگای دیرەزور بەشێکی زۆر یەدەگ و کێڵگەی نەوتی سوریای تێدایە و ئێستا بەشێکی زۆری لەژێر کۆنتڕۆڵی هێزەکانی سوریای دیموکراتدایە و ئەمریکاش پارێزگاری لەو کێڵگانە دەکات.
ئامانجی جوڵەپێکردنی ئەو کاروانە سەربازییە بە پێی زانیارییەکانی ئاژانسەکە بۆ توندوتۆڵکردنی ناوچەی جەزیرەیە و کۆنترۆڵکردنی زیاتری کێڵگە نەوتییەکانە.
هاوکات دوو هێلیکۆپتەری سوپای ئەمریکا لە ناوچەکە نیشتوونەتەوە و زیاتر لە 25 سەربازیان پێبووە و دوای نیشتنەوەی بۆ ماوەیەک بەرەو سنووری عێراق گڕاوەتەوە.
حکومەتی سوریا ئەمریکا و هێزەکانی سوریای دیموکرات بەوە تۆمەتبار دەکات کە نەوتی سوریا لە ڕێگەی هەرێمی کوردستان و عێراقەوە دەفرۆشن، بەبێ ئەوەی ڕەزامەندی نێودەوڵەتی لەسەر ئەم پرسە هەبێت.
