بەڕێوەبەرایەتیی گشتیی تەندروستیی هەولێر، دەوامی سەرجەم دامودەزگاکان و نەخۆشخانەکانی سنووری بەڕێوەبەرایەتییەکەی بەهۆی مانگی ڕەمەزانەوە ماوەی یەک کاتژمێر کەمکردەوە.
لە ڕاگەیەندراوێکدا بەڕێوەبەرایەتیی گشتیی تەندروستیی هەولێر چەند بڕیارێکی سەبارەت بە دەوامکردنی دامەزراوە و نەخۆشخانە و سەنتەرەکانی سەربە بەڕێوەبەرایەتییەکەی دەرکرد و بەپێی بریارەکە دەوام لە بەڕێوەبەرایەتییە گشتییەکان، بەڕێوەبەرایەتییەکان و هەر دامودەزگایەکی دیکە، لە ڕۆژانی ئاساییدا دەوام لە کاتژمێر 3:00 کەمدەکرێتەوە بۆ کاتژمێر 2:00ی پاشنیوەڕۆ.
هەروەها لە نەخۆشخانە، سەنتەرەکان، مەڵبەند و بنکە تەندروستییەکان دەوامی فەرمی کەمدەکرێتەوە لە کاتژمێر 2:00ی پاشنیوەڕۆ بۆ کاتژمێر 1:00ی پاشنیوەڕۆ.
هەر بەپێی بڕیارەکەی بەڕێوەبەرایەتیی گشتیی تەندروستیی هەولێر، نۆڕینگە میلییەکان و ڕاوێژکارییەکان و نیمچە تایبەتەکان، بەهەمان شێوە یەک کاتژمێر دەوامیان کەمدەکرێتەوە.
بڕیاری تایبەت بە نەخۆشخانەکانی فریاکەوتن و بەشەکانی فریاکەوتنی نەخۆشخانەکان و نۆڕینگە ئێشکگرییەکان و هەموو ئەو شوێنانەی دوای دەوامی فەرمی ئێشکگرییان هەیە لەڕێگەی بەڕێوەبەرەکانیانەوە خشتەی دەوامەکانیان ڕێکدەخرێت.
