ئەمڕۆ هەینی، ڕەزا بەراهەنی شاعیر و ڕەخنەگری بەناوبانگی فارس کۆچی دواییکرد.
ئۆکتای بەراهەنی، کوڕی ڕەزا بەراهەنی، لە ئەژماری ئینستاگرامی خۆیەوە هەواڵی کۆچی دوایی باوکی لە وڵاتی کەنەدا ڕاگەیاند و ڕەتیکردەوە هۆکاری مردنەکەی ڕوونبکاتەوە.
ڕەزا بەراهەنی شاعیر و ڕەخنەگرێکی ئەدەبیی بەناوبانگی فارسی بە ڕەچەڵەک تورک بوو، ساڵی 1935 لە شاری تەبرێز لەدایک بووبوو و لە تەمەنی 22 ساڵیدا بڕوانامەی بەکالۆریۆسی لە زمان و ئەدەبی ئینگلیزیدا بەدەستهێنابوو، پاشانیش لە وڵاتی تورکیا خوێندنی دوکتۆرای تەواوکردبوو.
ڕەزا بەراهەنی لە هەڵوێست و نووسینیشدا ڕەخنەگرێکی توندی ڕژێمی کۆماری ئیسلامیی ئێران بوو، لە ساڵانی شۆڕشی کورددا یەکێک بوو لەو نووسەرانەی لە ڕۆژنامە و گۆڤارەکانی ئەوسادا بەرگریی لە خەباتی نەتەوەیی کورد دەکرد.
بەراهەنی زیاتر لە 70 کتێبی بە زمانی فارسی نووسیوە و بەرهەمەکانی وەرگێڕدراونەتە سەر زمانە جیهانییەکانی وەک ئینگلیزی، فەرەنسی و سویدی.
ئەم شاعیر و نووسەرە ئەمڕۆ لە تەمەنی 87 ساڵیدا لە وڵاتی کەنەدا کۆچی دواییکرد.
