دوای بڕیارەكەی دادگای فیدراڵیی عێراق لەبارەی نایاساییبوونی یاسای نەوت و غازی هەرێمی كوردستان، حكومەتی هەرێم ئامادەیە لەبارەی دۆسیەكانی نەوت، بودجە و مووچەوە لەگەڵ عێراق ڕێكبكەوێت.
بەپێی ئەو زانیارییانەی لە سەرچاوەیەكی باڵای ئەنجومەنی وەزیرانی هەرێمی كوردستانەوە بە تۆڕی میدیایی ئێستا دراون، دوای بڕیارەكەی دادگای فیدراڵی، ئەنجومەنی وەزیران و ئەنجومەنی باڵای ئابوریی هەرێم لە دوا كۆبوونەوەیاندا تاوتوێی بڕیارەكەی دادگای فیدراڵییان كردووە سەبارەت بە دۆسیەی نەوت، هەرێم ئامادەیە لەبارەی دۆسیەكانی نەوت، بودجە و مووچەوە لەگەڵ حكومەتی عێراق دانوستان دەستپێبكات و بگەنە ڕێككەوتن.
لە زانیارییەكاندا هاتووە، “ئەنجومەنی وەزیران ئامادەیە بە دانوستان لەگەڵ بەغداد میكانیزمێك بدۆزرێتەوە بۆ گەیشتن بە ڕێككەوتن و دانوستانەكانیش دەكەونە دوای پێكهێنانی كابینەی نوێی حكومەتی عێراق”.
ئاماژە بەوە كراوە، “ئێستا حكومەتی هەرێم ئامادەیە بۆ دانوستان لەگەڵ حكومەتی عێراق، بەڵام كابینەی حكومەت كارەكانی بەكۆتاهاتوون و چاوەڕوانی كابینەی نوێی حكومەتی عێراق دەكرێت هەرێمی كوردستان بتوانێت لەسەر كێشە هەڵپەسێردراوەكان لەگەڵ بەغداد بگاتە ڕێككەوتن”.
