جێگری بەڕێوەبەری گشتیی خانەنشینیی هەرێم ڕوونكردنەوە لە بارەی گۆڕینی میكانیزمی دابەشكردنی مووچەی خانەنشینان لە هەرێمی كوردستان دەدات، دەڵێت “كاردەكرێت بۆ ئەوەی دابەشكردنی مووچەی خانەنشینی بكرێتە كارتی بانكی”.
لەشكر ئیبراهیم، جێگری بەڕێوەبەری گشتیی خانەنشینیی هەرێمی كوردستان لە لێدوانێكدا بە تۆڕی میدیایی ئێستای ڕاگەیاند، دەتوانرێت شێوازی دابەشكردنی مووچەی خانەنشینی بگۆڕدرێت، زیادكردنی بنكەكانی تایبەت بە دابەشكردنی مووچەی خانەنشینی یەكێكە لە ڕێگاكان.
ئاشكراشیكرد، “لە ئێستادا بەڕێوەبەری گشتیی بانكەكان لەگەڵ كۆمپانیایەك هەماهەنگیی كردووە بۆ دابەشكردنی مووچەی خانەنشینی لە ڕێگای كارتی بانكییەوە”.
بەرپرسەكەی خانەنشینیی هەرێمی كوردستان پێیوایە، “بە دابەشكردنی مووچە لەڕێگای كارتی بانكییەوە ئەو گرفتەی لە چەند ڕۆژی ڕابردوو هەبووە، چارەسەردەكات و هەر بانكێكی حكومیی هەبێت خانەنشینان دەتوانن مووچەكەیان لەو بانكە وەربگرن، نەك بنكەیەكیان بۆ دیاریبكرێـت”.
لەشكر ئیبراهیم ڕاشیگەیاند، “ئەنجومەنی پارێزگاكان دەتوانن گۆڕانكاری لە شێوازی دابەشكردنی مووچەی خانەنشینان بكەن و بنكەی تایبەت بە مووچەی خانەنشینان زیادبكەن”.
ئەمڕۆ سێشەممە ئازاد محەمەد ئەمین، سەرۆكی ئەنجومەنی پارێزگای سلێمانی ڕایگەیاندبوو، “هەوڵدەدەین لە دوای پشووەكانی جەژنی نەورۆز میكانیزمی دابەشكردنی مووچەی خانەنشینان بگۆڕین”.
لە چەند ڕۆژی ڕابردوودا دوو خانەنشین لە سلێمانی و پێشمەرگەیەكی خانەنشین لە قەزای سۆران لەسەرەی وەرگرتنی مووچەی مانگی دوودا گیانیان لەدەستدا، داوكاری گشتیی هەرێم ڕوونكردنەوەیەكی بڵاوكردەوە و داوای لێكۆڵینەوەی لەو ڕووداوەی قەزای سۆران كرد، هاوكات داوای لە وەزارەتی دارایی كرد میكانیزمی دابەشكردنی مووچەی خانەنشینان بگۆڕێت.
