لەپای بەشداریكردنی گەرموگوڕانەیان لە ئاهەنگەکانی نەورۆزدا، هاوسەرۆکایەتیی هەدەپە پەیامێکی سوپاسگوزاریی ئاراستەی كوردانی باکووری کوردستان و تورکیا كرد و دەڵێت، “مكوڕین لەسەر تێکۆشانی گەورە بۆ گەیشتن بە سەرکەوتن”.
هەریەک لە پەروین بوڵدان و میدحەت سانجار، هاوسەرۆکانی پارتی دیموکراتی گەلان-هەدەپە، پەیامێکیان بڵاوکردووەتەوە و دەڵێن، “لە گەڤەرەوە هەتا چاناک کالە، لە وانەوە هەتا ئەستەنبوڵ، لە ئامەد هەتا ئیزمیر، لە ئیدرەوە تا دەنیزلی، لە جزیرەوە هەتا چوکورۆڤا سوپاسی گەلەکەمان دەکەین، کە لە سەرانسەری وڵات جۆشیان بە نەورۆز دا”.
هاوسەرۆکانی هەدەپە لە درێژەی پەیامەكەیاندا ڕایانگەیاندووە، “سوپاسی ژنان دەکەین کە لە 8ی مارسەوە لە گۆڕەپانەکاندان، سوپاسی گەنجان دەکەین کە بە بڕیاردارییەکی گەورەوە خاوەنداری لە ئاییندە دەکەن، سوپاسی بەرخۆدێران دەکەین لە حەوت ساڵییەوە تا 70 ساڵی”.
لە كۆتایی پەیامەكەیاندا هاوسەرۆکانی هەدەپە جەخت لە درێژەدان بە تێكۆشان دەكەنەوە و دەڵێن، “لە هەموو کاتێک زیاتر بەهیوا و جۆش و بەبڕیارین، ئێمە بەو گەرموگوڕییەی لە پیرۆزباییەکانی نەورۆزەوە وەرمانگرتووە، مكوڕین لەسەر تێکۆشانی گەورە بۆ گەیشتن بە سەرکەوتن، جارێکی دیکە نەورۆز لە گەلەکەمان و گەلان پیرۆز دەکەین”.
ئەمساڵ ملیۆنان كورد لە باکووری کوردستان و تورکیا بە گەرموگوڕییەکی زۆرەوە بەشدارییان لە ئاهەنگەکانی نەورۆزدا کرد، تەنها لە ئامەد نزیکەی دوو ملیۆن کەس بەشدارییان لە ئاهەنگەکەدا کردبوو.
س: ڕۆژنیوز
