لقی سلێمانیی بانكی ناوەندیی هەرێم لیژنەیەكی پێكهێنا بۆ لێكۆڵینەوە لەبارەی گیانلەدەستدانی ئەو دوو خانەنشینەی ئەمڕۆ لە سلێمانی لەكاتی وەرگرتنی مووچەدا گیانیان لەدەستدا.
ئەمڕۆ لە سلێمانی و لەبەردەم بانكی تانجەرۆ، لەكاتی دابەشكردنی مووچەدا، بەهۆی دروستبوونی پاڵەپەستۆ و قەرەباڵغییەوە، دوو خانەنشین گیانیان لەدەستدا و ژمارەیەكی دیكەش تووشی تەنگەنەفەسی و ناڕەحەتی بوون.
بانکی ناوەندیی هەرێم – سلێمانی لە ڕاگەیەندراوێكدا ئاشكرایكردووە، “پاڵپشت بەو دەسەڵاتەی پێماندراوە، بڕیارماندا بە پێکهێنانی لیژنەیەک بۆ لێکۆڵینەوە لە هۆکارەکانی مردنی دوو هاونیشتمانی لەبەردەم بانکی تانجەرۆ لەکاتی وەرگرتنی مووچەی خانەنشینیدا”.
بەپێی ڕاگەیەندراوی بانكەكە، بەشداری نوێنەری داواکاری گشتیی سلێمانی لە لیژنەكەدا بەشدار دەبێت، ناوی ئەندامانی لیژنەكەش دیاریكراون.
ئەو دوو خانەنشینەی ئەمرۆ گیانیان لەدەستدا، بریتیبوون لە ئازاد ئیسماعیل، كە تەمەنی 76 ساڵ بوو، هەروەها عەزیز ئیبراهیم-ی تەمەن 70 ساڵ.
