جێگری پارێزگاری هەڵەبجە ڕایدەگەیەنێت، سەرۆك وەزیرانی عێراق وەزیری پلاندانانی ڕاسپارد بەزووترین كات ڕێكارەكانی بەپارێزگابوونی هەڵەبجە تەواوبكرێن و كۆدی تایبەتی وەكو پارێزگای نۆزدەیەمینی عێراق وەرگرت.
كاوە شێخ عەلی، جێگری پارێزگاری هەڵەبجە ڕایگەیاند، بەدواداچوونمان بۆ ڕێكارەكانی بەپارێزگابوونی هەڵەبجە كرد، نووسینگەی سەرۆك وەزیران و وەزارەتی پلاندانانی عێراق، ئاگاداریانكردینەوە كە مستەفا كازمی ڕەزامەندی لەسەر ڕاپۆرتی وەزارەتی پلاندانان تایبەت بە بەپارێزگاكردنی هەڵەبجە دەربڕیوە.
ئاماژەی بەوە كرد، “وەزیری پلاندانان ڕاسپێردراوە، بەزووترین كات ڕێكارەكانی بەپارێزگابوونی هەڵەبجە تەواوبكات و ئاراستەی لایەنی پەیوەندیداری بكاتەوە”.
جێگری پارێزگاری هەڵەبجە باسی لەوە كرد، “پێمان ڕاگەیەندراوە ڕێكارەكان بەپەلە تەواودەكرێن و پارێزگای هەڵەبجە كۆدی تایبەتی وەك پارێزگای نۆزدەیەم وەرگرتووە و نەخشەی پارێزگاكەش جێگیركراوە”.
