ڤۆلۆدیمێر زیلینسكی سەرۆكی ئۆكرانیا، داوایكرد ناوچەی دژەفڕین لە ئۆكرانیا بسەپێندرێت و فڕۆكەی شەڕكەر بدرێت بە وڵاتەكەی، سزای زیاتریش بەسەر ڕوسیادا بسەپێندرێت.
ڤۆلۆدیمێر زیلینسكی سەرۆكی ئۆكرانیا، ئەمڕۆ چوارشەممە وتەیەكی لەڕێگەی ڤیدیۆوە لەبەردەم كۆنگرێسی ئەمریكادا پێشكەشكرد و ڕایگەیاند، ئۆكرانیا سوپاسی ئەمریكا دەكات لەپای هاوكارییەكانیدا و چاوەڕوانی زیاتری لێدەكات.
زیلینسكی داوایكرد ناوچەی دژەفڕین لە ئۆكرانیا بسەپێندرێت و كۆمەڵەیەكی نێودەوڵەتی پێكبهێنرێت بۆ پشتیوانیكردنی ئۆكرانیا و وتی، “دامەزراوە نێونەتەوەییەكان بەشێوەیەكی باش كاریان نەكردووە”.
سەرۆكی ئۆكرانیا داوای لە كۆمەڵی نێودەوڵەتی كرد سزای زیاتر بەسەر ڕوسیادا بسەپێنێت و جەختیكردەوە كە “ڕوسیا دەستدرێژی كردووەتەسەر ئۆكرانیا بۆ ئەوەی مافی ئازادی و سەروەری و ژیانی ئاشتییانەی لێزەوتبكات”.
وتیشی، “هێزەكانی ڕوسیا نزیكەی هەزار مووشەكیان ناوە بە شارەكانمانەوە” و داوایكرد فڕۆكەی شەڕكەر بدرێت بە ئۆكرانیا لەپێناو بەرگریكردن لە خۆی دژ بە هێرشەكانی ڕوسیا.
