دوای هەوڵەكانی یەکێتی پارێزگاری بە وەكالەتی کەرکوک نووسراوەکەی پێشووی کشاندەوە و لە نوسراوێکی نوێدا وێڕای پیرۆزبایكردن دەڵێت، بەڕێوەچوونی ئاهەنگەكانی نەورۆز ڕێگەپێدراوە لە شارەكەدا.
ڕاکان جبوری، پارێزگاری بەوەكالەتی کەرکوک لە نووسراوێكدا لەبارەی بەڕێوەچوونی ئاهەنگەكانی نەورۆز لە پارێزگاكەدا ئاماژەی بەوەكردووە، “پیرۆزبایی لە گەلی کورد و پێكهاتەكانی دیكەی شارەكە دەكەم و تەواو ئازادن لە ئاهەنگگێڕان بە بۆنەی نەورۆزەوە”.
پاشگەزبوونەوەی پارێزگاری كەركوك لە بڕیارەكەی دوای ئەوەدێت، كە پێشتر ئاسۆ مامەند سەرپەرشتیاری کەرکوک-سەڵاحەدینی یەکێتیی نیشتمانیی کوردستان بە تۆڕی میدیایی ئێستای ڕاگەیاندبوو، “بۆ جەژنی نەورۆزی ئەمساڵ كە بۆنەیەكی نەتەوەییە، یادی دەكەینەوە و هاوشێوەی ساڵانی ڕابردوو ڕێوڕەسمەكانی تایبەت بە جەژنی نەورۆز وەكو خۆیان بەڕێوەدەچن”.
جەختیشی كردبووەوە، “هەر بڕیارێك دەربكرێت بۆ سنوورداركردنی ئاهەنگ و ڕێوڕەسمەكانی جەژنی نەورۆز لە كەركوك پابەندی نابین و ڕێوڕەسمەكانی تایبەت بە جەژنی نەورۆز وەكو خۆیان بەڕێوەدەچن”.
