نێچیرڤان بارزانی سەرۆکی هەرێمی کوردستان ئەمڕۆ دووشەممە لەگەڵ فەرماندەکانی هێزی پێشمەرگەی کوردستان کۆدەبێتەوە و مەبەستی کۆبوونەوەکەش هێرشەکانی ئەمدواییەی داعشە بۆسەر پێشمەرگە.
لە هەفتەی ڕابردووەوە چەکدارانی داعش شەش هێرشیان لە سنوورەکانی گەرمیان و مەخموور بۆسەر هێزەکانی پێشمەرگە ئەنجامداوە و لەسەرجەم هێرشەکاندا زیاتر لە 18 پێشمەرگە و هاوڵاتیی سیڤیل شەهیدبوون.
بڕیارە ئەمڕۆ سەرۆکی هەرێمی کوردستان و فەرماندەکانی پێشمەرگە لەبارەی هێرشەکان و گرتنەبەری هەنگاوی پێویست بۆ ڕووبەڕووبوونەوەی ئەو هێرشانە کۆببنەوە.
لە دوایین هێرشدا کە چەکدارانی داعش لە سنووری کەرکوک ئەنجامیاندا چوار پێشمەرگە شەهید و دووانیش برینداربوون، لەوبارەیەوە نێچیرڤان بارزانی ڕایگەیاند هێرشەکان مەترسین بۆسەر ئاسایش و سەقامگیریی عێراق و ناوچەکە و تەنانەت جیهانیش.
