بەهۆی ئەوەی دانیشتووانی هەردوو ناحیەی خەلەکان و خدران و رێگە بە هاتوچۆی ئۆتۆمبێلی بارهەڵگر نادەن و ئەوانیش رێگای پردی دەربەند بەکاردەهێنن، مەترسی داڕمانی پردەکە هەیە و هاتوچۆی راپەڕین هۆشداری دەدات.
بەڕێوەبەرایەتیی هاتوچۆی راپەڕین بڵاویکردەوە، لە ئێستادا بەهۆی خۆپیشاندان و مانگرتنی دانیشتووانی هەردوو سنووری ناحیەی خەلەکان و خدران رێگا بە هاتوچۆی ئۆتۆمبێلی بارهەڵگر بەهەموو جۆرەکانییەوە نادرێت ئەمەش وایکردووە رێگای پردی دەربەند بەکاربهێنرێت، بەو هۆیەوە مەترسی داڕمان و رووخانی پردەکە هەیە.
باس لە ئەوەش کراوە، “پردەکە توانای هەڵگرتنی بارهەڵگری نەماوە تکایە بەهەموو شێوەیەک هاتوچۆی ئۆتۆمبێلی بارهەڵگر رابگرن تاکو کارەساتێکی نەخوازراو رووی نەداوە “.
