ئەستێرەی بەرازیلیی یانەی یوڤانتۆس، ئارسەر مێلۆ لەگەڵ مێسی و نێیمار و کریستیانۆدا یاریکردووە و تایبەتمەندیی هەر یەکێک لەو یاریزانانە ئاشکرادەکات.
لیۆنێل مێسی و کریستیانۆ ڕۆناڵدۆ و نێیمار، سێ بەتواناترین یاریزانانی بواری تۆپی پێن کە تاوەکو ئەم ساتە لەنێو یاریگاکاندا بەردەوامن و وازهێنانیان ڕانەگەیاندووە.
لە دیدارێکدا لەگەڵ کەناڵی “تی ئێن تی سپۆرتس”ی ئەرجەنتینی، یاریزانی پێشووی یانەی بەرشلۆنە، ئارسەر کە لەگەڵ هەرسێ یاریزانەکەدا یاریکردووە، جیاوازیی نێوانیان دەردەخات.
ئارسەر دەڵێت، “کریستیانۆ وەرزشوانێکی زۆر پرۆفێشناڵە، هەمیشە ئاگاداری خووە تایبەتییەکانییەتی و لێیان لانادات، نەیمار-یش بلیمەتە، لەژێر فشاردا گەشەدەکات و وەک هیچ یاریزانێکی دیکە نییە”.
هەروەها لەبارەی مێسی-یەوە دەڵێت، “مێسی لەلایەن خوداوە هەڵبژێردراوە. لە بێدەنگیدا زۆرترین کاردەکات”.
لەنێوان سیانەی ناوبراودا، کریستیانۆ و مێسی خەڵاتی باڵۆندۆر-یان بەدەستهێناوە و نێیمار تاوەکو ئێستا ئەو خەونەی بەدینەهێناوە.
