نرخی نەوت لە بازاڕەكانی جیهاندا زیاتر دابەزی، یەك بەرمیل نەوتی خاوی برێنت بە 109 دۆلار مامەڵەی پێوەدەكرێت.
ئەمڕۆ هەینی، یەك بەرمیل نەوتی خاوی برێنت لە بازاڕەكانی جیهاندا بە 109 دۆلار و 2 سەنت مامەڵەی پێوەدەكرێت، یەك بەرمیل نەوتی خاوی ئەمریكا بە 106 دۆلار و 3 سەنت مامەڵەی پێوەدەكرێت، دوای ئەوەی دوێنێ بەرمیلێك نەوتی برێنت لە سەرووی 112 دۆلارەوە مامەڵەی پێوەدەكرا.
گۆڕانكاریی بەردەوامی نرخی نەوت لە چەند ڕۆژی ڕابردوودا پەیوەندی بە جەنگی ئۆكرانیا و ڕوسیاوە هەیە، ڤلادیمێر پوتین، سەرۆكی ڕوسیا لە كۆبوونەوەی دوێنێی حكومەتەكەیدا وڵاتانی خۆرئاوای تۆمەتباركرد و ڕایگەیاند، “بەرزبوونەوەی نرخی نەوت پەیوەندی بە ڕوسیاوە نییە، بەڵكو بەهۆی سیاسەتە هەڵەكانی ئەوروپا و ئەمریكاوەیە”.
