ناسا بیر لە لێکۆڵینەوەی ئەگەر و توانای سێکسکردن لە بۆشایی ئاسماندا دەکاتەوە و ئەم پرسە بە “گرنگ” دەزانێت.
لە وەڵامی توێژینەوەیەکدا کە لەلایەن پێنج توێژەری کەنەدییەوە ئەنجامدراوە، “ناسا” بیر لە لێکۆڵینەوەی ئەگەر و توانای سێکسکردن لە بۆشایی ئاسماندا دەکاتەوە، چونکە ئەم پرسە بە “گرنگ” دەزانێت بۆ ئەوانەی دەیاننێرێتە بۆشایی ئاسمان، یان دەیاننێرێتە هەسارەکانی تر و سەرمانگ، کە گەشتەکانیان چەندین مانگ و هەندێک جار چەندین ساڵیش دەخایەنن.
توێژەرە کەنەدییەکانی زانکۆی کۆنکۆرد لە مۆنتریاڵ، بە ڕۆژنامەی “دەیلی مەیڵ”ی بەریتانییان ڕاگەیاند، تێگەیشتن لە پڕۆسەی سێکسکردن و چۆنێتیی ئەنجامدانی تەندروستانەی لە ژینگەیەکدا کە هێزی کێشکردنی نزمە، پرسێکی گرنگە بۆ سەرکەوتوویی پڕۆژەکانی بۆشایی ئاسمان و دەرەوەی بەرگەهەوا.
ناسا بەردەوام خۆی بەدوورگرتووە لە پرسی سێکسکردنی نێوان کارمەندەکانی لە بۆشایی ئاسماندا و پێشتر جەختیکردووەتەوە کە “سێکسکردن لەنێوان مرۆڤەکاندا، لە بۆشایی ئاسمان ڕووینەداوە”.
سەرباری ئەمە، بەم دواییانە “ناسا” ڕایگەیاندووە کە ئیدی کاتی دۆزینەوەی ڕێگایەک بۆ چارەسەرکردنی ئەم پرسە هاتووە.
