وەزیری كشتوكاڵ و سەرچاوەكانی ئاوی هەرێمی كورستان، داوادەكات بڕیارێكی وەزارەتی كشتوكاڵی حكومەتی عێراق تایبەت بە ڕاگرتنی بەرهەمە پەلەوەرییەكان لە هەرێمی كوردستانەوە بۆ پارێزگاكانی ناوەڕاست و باشووری عێراق هەڵبوەشێندرێتەوە.
بەپێی نووسراوێكی وەزارەتی كشتوكاڵی عێراق، داوا لە نووسینگەی سەرۆكایەتیی ئەنجومەنی وەزیران و ناوەندی ئۆپەراسیۆنی نیشتمانی كراوە، هاوردەكردنی بەرهەمە پەلەوەرییەكانی هەرێمی كوردستان بۆ پارێزگاكانی ناوەڕاست و باشووری عێراق ڕابگرن.
بێگەرد تاڵەبانی، وەزیری كشتوكاڵ و سەرچاوەكانی ئاوی هەرێمی كوردستان ئەمڕۆ پێنجشەممە بڵاویكردەوە، “پێویستە بە زووترین كات ئەو بڕیارە هەڵبوەشێندرێتەوە و بەردەوامبین لە كاری هاوبەش كە پێشتر لێكتێگەیشتن لەنێوانماندا هەبووە”.
ئاماژەی بەوە كردووە، “بڕیارەكەی وەزارەتی كشتوكاڵی عێراق زیان بە كەرتی پەلەوەر و خاوەن پڕۆژەكان لە هەرێمی كوردستان دەگەیەنێت و داوادەكەین ئەو بڕیارە هەڵبوەشێندرێتەوە”.
