بەڕێوەبەری فرۆكەخانەی نێودەوڵەتیی سلێمانی ڕایدەگەیەنێت، بۆ گەشتكردنی هاوڵاتییان دەبێت هەردوو ژەمە ڤاكسین و پشكنینی “PCR” ئەنجامدرابن و “ئەوەی حكومەتی عێراق كاری لەسەر دەكات تائێستا بە فەرمی بە ئێمە نەگەیشتووە”.
حكومەتی عێراق بڕیاریداوە هەر كەسێك گەشتبكات ئەگەر هەردوو ژەمە ڤاكسینەكەی وەرگرتبێت پێویست بە پشكنینی “PCR” ناكات كە 48 كاتژمێر پێشتر پشكنینی ئەنجامدابێت .
تاهیر عەبدوڵڵا، بەڕێوەبەری فڕۆكەخانەی نێودەوڵەتیی سلێمانی لە لێدوانێكدا بە تۆڕی میدیایی ئێستای ڕاگەیاند، بە فەرمی حكومەتی عێراق و حكومەتی هەرێم ڕێنمایی نوێیان ئاراستەنەكردووین تایبەت بە گەشتیاران كە ئەگەر كەسێك هەردوو ژەمە ڤاكسینی وەرگرتبێت پێویستی بە پشكنینی “PCR” نەبێت، بەڵكو دەبێت هەردوو ژەمە ڤاكسینەكەی وەرگرتبێت و پكشنینی “PCR”ی پێبێت ئەو كات ڕێگەی گەشتكردنی پێدەدرێت و ئێمەش ئاگاداری ئەوەین، بەڵام دەبێت بە فەرمی بڕیارەكەمان بەدەستبگات ئەوكات جێبەجێیدەكەین.
بەڕێوەبەری فڕۆكەخانەی نێودەوڵەتیی سلێمانی باسی لەوە كرد، گەشتیارانی هاتوو و ڕۆیشتوو دەبێت كارتی هەردوو ژەمە ڤاكسینیان پێبێت و پشكنینی “PCR”یان ئەنجامدابێت ڕێگەی گەشتكردنیان پێدەدرێت.
