بەڕێوەبەری گشتیی هاتوچۆی هەرێم دەڵێت، وەزارەتی دارایی ڕەزامەندی نەداوە ئۆتۆمبێلە بێسەرەتاكان كە مۆدێلیان نزمە و هێندراونەتە هەرێمی كوردستان تۆماربكرێن.
لیوا عەبدولقادر عەزیز، بەڕێوەبەری گشتیی هاتوچۆی هەرێم لە لێدوانێكدا بە تۆڕی میدیایی ئێستای ڕاگەیاند، “ئەو ئۆتۆمبێلانەی بە قاچاخ و نایاسایی هێندراونەتە هەرێمی كوردستان پێشتر ئێمە كۆدێكمان بۆ دروستكردن تا زانیاریمان لەسەر ژمارە و جۆرەكانیان هەبێت كە لە شارەكانی هەرێمی كوردستاندا دەسووڕێنەوە”.
ئاشكرایكرد، “یەكلاكردنەوەی چارەنووسی ئەو ئۆتۆمبێلانە پێویستی بە ڕێككەوتنی وەزارەتەكانی ناوخۆ و دارایی هەرێمی كوردستان هەبووە، بەڵام دواتر وەزارەتی دارایی ڕەزامەندی نەدا ئۆتۆمبێلە بێسەرەتاكان تۆماربكرێن”.
بە وتەی بەڕێوەبەری هاتوچۆی هەرێم، “تائێستا هیچ بڕیارێكی نوێ لەبارەی تۆماركردنی ئۆتۆمبێلە بێسەرەتاكان نەدراوە كە لە شار و شارۆچكەكانی هەرێمی كوردستاندا دەسووڕینەوە”.
