ئەو سەربازە ئەمریكییانەی بەشداریی هەردوو شەڕی عێراق و ئەفغانستانیان كردووە، بودجەیان بۆ تەرخاندەكرێت.
ئەمریكا پڕۆژەیاسایەك دەخاتە بەردەم ئەنجومەنی نوێنەرانی وڵاتەكەی تایبەتە بە تەرخانكردنی بودجەیەك بۆ چارەسەركردنی سەربازانی وڵاتەكەی كە بەشداربوون لە شەڕەكانی عێراق و ئەفغانستان و بەوهۆیەوە دووچاری نەخۆشیی درێژخایەن و مەترسیدار بوون.
لە پڕۆژەیاساكەدا پێشنیاز بۆ ئەنجومەنی نوێنەرانی ئەمریكا كراوە 300 ملیار دۆلار بۆ چارەسەری سەربازانی وڵاتەكە تەرخانبكرێت كە بەشداربوون لە شەڕەكانی عێراق و ئەفغانستاندا.
نانسی پیلۆسی، سەرۆكی ئەنجومەنی نوێنەرانی ئەمریكا ڕایگەیاند، پڕۆژەیاساكە دەرگا دەكاتەوە بۆ ملیۆنان سەربازی ئەمریكا تا لەڕێگای ئەو پڕۆژەیەوە سوودمەندببن و چارەسەر وەربگرن.
ئاماژە بەوەشكراوە، لە ڕابردوودا بە هەزاران سەربازی ئەمریكا دووچاری نەخۆشیی شێرپەنجە و هەوكردن بوون، گرفتیان لە بۆریی هەناسەدان و سییەكاندا بۆ دروستبووە و هۆكارەكەشی ئەنجامی بەركەوتنیان بووە بە ماددە ژەهراوییەكان.
هاوكات ئەكادیمیای نیشتمانی بۆ زانست و ئەندازیاری ساڵی 2020 لە ڕاپۆرتێكدا بڵاویكردووەتەوە، بە كاریگەریی جەنگ، ژمارەیەكی زۆر لە سەربازانی ئەمریكا كە بەشداریی شەڕەكانی عێراق و ئەفغانستانیان كردووە، دووچاری نەخۆشیی هەوكردن، ڕەبۆ و شێرپەنجەی سییەكان بوون و تەندروستییان ناجێگیرە.
