ڤاگنەرەكان كێن؟
گروپێكی شەڕكەری ڕوسی، بەنیازی “كوشتنی زیلینسكی”ن

گروپێكی چەكدار كە میدیای جیهان بە “كرێگرتە و بكوژی بەكرێگیراو” ئەندامەكانی ناوزەد دەكات، هەزاران چەكداری خۆی ناردووە بۆ ئۆكرانیا و 400یان گەیشتوون بە پایتەختی ئەو وڵاتە، ئەركەكەشیان “كوشتنی سەرۆكی ئۆكرانیایە”.

ڤاگنەرەكان فەرمانی ڤلادیمێر پوتین سەرۆكی ڕوسیایان پێیە بۆ كوشتنی ڤلۆدیمێر زیلینسكی سەرۆكی ئۆكرانیا، ئەمە ناوەڕۆكی ڕاپۆرتێكی ڕۆژنامەی “تایمز”ی بەریتانییە و دەڵێت، 400 ئەندامی هێزی ڤاگنەر گەیشتوون بە كێیڤی پایتەختی ئۆكرانیا، ئامانجیان كوشتنی سەرۆكی وڵاتەكەیە.

بەپێی ڕاپۆرتەكە، ئەو چەكدارانە فەرمانیان لە ڤلادیمێر پوتین سەرۆكی ڕوسیا وەرگرتووە بۆ كوشتنی ڤلۆدیمێر زیلینسكی سەرۆكی ئۆكرانیا و 23 كەسایەتیی حكومیی دیكە، تا لەو ڕێگەیەوە زەمینەسازی بكەن بۆ كۆنترۆڵكردنی تەواوی ئۆكرانیا لەلایەن ڕوسیاوە.

زانیارییەكانی ڕۆژنامەكە دەڵێن، مۆسكۆ بەڵێنی بە چەكدارانی ڤاگنەر داوە لەپای كارەكانی كوشتندا پاداشتی زۆریان پێبدات و ڕێڕەوی سەلامەتیان بۆ بڕەخسێنێت بۆ دەربازبوون لە ئۆكرانیا.

ڕۆژی شەممەی ڕابردوو زانیارییەكان لەبارەی پلانەكەی ڕوسیاوە دزەیانكردووە بۆ حكومەتی ئۆكرانیا و ئاشكرابوون، بۆیە وەك تایمز دەڵێت، “كیێڤ بڕیاری قەدەغەی هاتوچۆكردنی دا بۆ ماوەی 36 كاتژمێر و هەڵمەتی گەڕان بەدوای ڤاگنەرەكانی دەستپێكرد، داواشی لە هاوڵاتییانی خۆی كرد لەپێناو پارێزگاریكردن لە ژیانیان نەچنە دەرەوەی ماڵەكانیان، چونكە هەر كەسێك سەرپێچی بكات و لە دەرەوە ببینرێت، وەك كرێگرتەی ڕوسیا مامەڵەی لەگەڵدا دەكرێت.

بەپێی ڕۆژنامەكە، لە مانگی كانوونی دووەمی ڕابردوودا لەنێوان 2000 بۆ 4000 چەكداری ڤاگنەر گەیشتوون بە ئۆكرانیا و لە هەردوو ناوچەی دۆنیتسك و لۆهانسك بڵاوبوونەتەوە، بەڵام بەمدواییانە 400ی تریان لەڕێگەی بیلاڕوسیاوە ڕاستەوخۆ خۆیان گەیاندووە بە كیێڤ.

“ئەو چەكدارانەی ڕوسیا ئەزموونی شەڕكردنیان هەیە لە سوریا و لیبیا و بە جلی مەدەنییەوە خۆیان گەیاندووە بۆ ئۆكرانیا”، دوو كاربەدەستی ئەمنیی ئەوروپا وایان بە تایمز وتووە.

ڤاگنەر گروپێكی چەكدارە و میدیای خۆرئاوا دەڵێت، بە پارە كار بۆ حكومەتی ڕوسیا و كۆمپانیاكانی ئەو وڵاتە دەكەن، پەیوەندییان لەگەڵ دەزگاكانی هەواڵگری و ئاسایشی ڕوسیادا هەیە، لە چەندین شەڕی ناوچەی خۆرهەڵاتی ناوەڕاستدا بەشدارییانكردووە و ئەزموونی سەربازییان پەیداكردووە، لە چەند وڵاتێكیش وەك ڕاوێژكار كاریان بۆ حكومەتەكان كردووە، لەوانە كۆماری ئەفریقای ناوەڕاست و سودان و مالی.

لە چەند ڕۆژی ڕابردوودا ڤلۆدیمێر زیلینسكی سەرۆكی ئۆكرانیا ڕایگەیاندبوو، ڕوسیا دەیەوێت بە پلەی یەكەم ئەو بكوژێت و بە پلەی دووەمیش خێزانەكەی و كەسانی دەوروبەری، تا لەو ڕێگەیەوە دەسەڵاتی خۆی بەسەر تەواوی ئۆكرانیادا بسەپێنێت و حكومەتێك بە سەركردایەتیی جوداخوازەكانی ئۆكرانیا كە پیاوی مۆسكۆن پێكبهێنێت.

هاوكاتی ئەو قسەیەی زیلینسكی، فەرەنسا نیگەرانیی خۆی نیشاندا لە سەلامەتیی ژیانی ناوبراو و جان ئیڤ لۆدریان وەزیری دەرەوەی فەرەنسا وتی، “فەرەنسا نیگەرانی سەلامەتیی زیلینسكی-یە و ئەگەر پێویستبێت ئێمە ئامادەین یارمەتی بدەین”.

بابەتی پێشتر

دادگای فیدراڵی دووبارەكردنەوەی خۆپاڵاوتنی بۆ پۆستی سەرۆك كۆمار بە نادەستووری ناوبرد

بابەتی دواتر

مەرجی وەزیری دارایی بۆ دابەزاندنی بەهای دۆلار ڕاگەیەنرا

بابەتی پەیوەندیدار
زیاتر ببینە

نرخی نەوت لە ئەمڕۆدا

نەوتی خاوی برێنت لە بازاڕەكانی جیهان بە بەراورد بە دوێنێ پێنجشەممە، نرخەكەی بەرزبوونەوەی بەخۆوە بینی و یەك بەرمیل…
Total
0
Share