ڕۆژنامەی واشنتن پۆست ئاشکرایکرد، دوێنێ هەینی گەڕان بەدوای چۆنێتیی دروستکردنی بۆمبی دەستی “مۆلۆتۆڤ” لە پێگەی گوگڵ ئاستی پێوانەیی تۆمارکردووە، کەلەلایەن هاوڵاتییانی ئۆکرانی و بەتایبەت ڕۆژهەڵاتی ئۆکرانیا گەڕانی بۆکراوە.
پێشتر وەزیری بەرگریی ئۆکرانیا داوای لە هاوڵاتییانی وڵاتەکەی کرد، هاوکاریی سوپای وڵاتەکەیان بکەن لە بەرگریکردن و ڕووبەڕووبوونەوەی سوپای ڕوسیا، هەروەها لە کیێڤ دوێنێ هەینی چەک بەسەر ژمارەیەکی زۆر خەڵکی پایتەختدا دابەشکرا.
ڕۆژنامەی واشنتن پۆست ئاماژەی بۆ ئەوە کردووە، زۆرترین گەڕان لە ناوچەکانی ڕۆژهەڵاتی ئۆکرانیا و لەژێر ناونیشانی “چۆنێتیی دروستکردنی مۆلۆتۆڤ” کراوە و لەکاتژمێرەکانی کۆتایی دوێنێ هەینیدا ژمارەی گەڕان بەو ناونیشانە بەشێوەیەکی چاوەڕواننەکراو بەرزبووەتەوە.
بۆمبی دەستی لە شلەی گڕگرتوو، بوتڵی شوشە و پارچە پەڕۆ دروستدەکرێت، بەجۆرێک شلە یان سوتەمەنییەکە دەکرێتە ناو بوتڵەکەوە و بە پارچە پەڕۆکە بوتڵەکە دادەخرێت و بەشێکیشی بۆ گڕگرتنی دەهێڵرێتەوە.
پێشتر جێگری وەزیری بەرگریی ئۆکرانیا حەنا مالیار رایگەیاند، گرنگە هەموو لایەک بەرگریی بکەن، داواشی لە ئۆکرانییەکان کرد چەکی ناوخۆیی بەکاربهێنن و هەوڵی دروستکردنی بدەن بۆ هاوکاریکردنی سەربازانی وڵاتەکەیان.
هەروەها وەزارەتی بەرگریی ئۆکرانیا لە پێگەی فەرمیی وەزارەتەکە بڵاویکردەوە، “داوا لەهاوڵاتییان دەکەین هاوکاریمان بکەن بۆ دوورخستنەوەی هێزی دوژمن، بۆمبی مۆلۆتۆڤ دروستبکەن و جوڵەی دوژمن ئیفلیج بکەن”.
