سەرۆكی سێ كۆمەڵە و ڕێكخراو بەهۆی گەندەڵییەوە دەستگیركران

دەستەی دەستپاكیی عێراق ئاشكرایكرد، تەنها لە پارێزگایەكدا گەندەڵی و دەستبەسەرداگرتن لە سەدان دۆنم زەویی میریدا كراوە و بە پارە فرۆشراون بە هاوڵاتییان، 14 كەس لە دۆسیەكەدا دەستگیركراون كە سیانیان سەرۆكی كۆمەڵە و ڕێكخراون.

بەپێی ڕاگەیەندراوی دەستەی دەستپاكیی عێراق كە ئەمڕۆ دووشەممە بڵاویكردووەتەوە، لە پارێزگای نەینەوا سەدان دۆنم زەویی حكومەت دەستیان بەسەرداگیراوە.

ڕوونیكردووەتەوە، چەند كەسێك كە سیانیان سەرۆكی كۆمەڵەی داكۆكیكردن لە كرێنشینان و دروستكردنی خانوو بۆ كەمدەرامەتانن، دەستیانگرتووە بەسەر 600 دۆنم زەویی حكومی و كشتوكاڵیدا و پارچەیان كردوون و بەشێوەی زەویی نیشتەجێبوون فرۆشتوویانن بە هاوڵاتییان.

دەستەی دەستپاكیی عێراق دەڵێت، “كۆمەڵەی دیار بۆ نیشتەجێكردنی خانەنشینان و كەمدەرامەتان” 233 دۆنم زەویی حكومەتیان داگیركردووە و دابەشیانكردووە بۆ 1200 پارچە زەوی بەمەبەستی فرۆشتنیان بە هاوڵاتییان.

بەهۆی ئەو دۆسیەیەوە، سەرۆكی كۆمەڵەكە و چوار ئەندامی دەستگیركراون و دەستیشگیراوە بەسەر بڕێك پارەدا كە لە فرۆشتنی زەویدا بەدەستیانهێناوە، وەك ڕاگەیەندراوەكە دەڵێت.

هەر لە نەینەوا، سەرۆكی كۆمەڵەی نیشتەجێكردنی كارمەندانی كۆمپانیای گشتیی كیندی و شەش كارمەندی كۆمەڵەكە دەستگیركراون، تۆمەتەكەیان وەك دەستەی دەستپاكی ئاشكرایكردووە، دەستبەسەرداگرتنی 144 دۆنم زەویی كشتوكاڵی بووە بەمەبەستی پارچەكردن و فرۆشتنەوەیان بە هاوڵاتییان.

كۆمەڵەیەكی دیكە كە كار لە بواری كرێنشینان و نیشتەجێكردندا دەكات، 230 دۆنم زەویی كشتوكاڵی داگیركردووە و پارچە پارچەیان كردوون بۆ فرۆشتنەوەیان بە هاوڵاتییان، بەو هۆیەوە سەرۆكی كۆمەڵەكە و كارمەندێكی دەستگیركراون و لێكۆڵینەوە لەگەڵ سەرجەم تۆمەتباراندا دەكرێت.

بابەتی پێشتر

دۆكیومێنتارییەك: چاپلن چوار ژنی هەرزەكاری هەبووە‏

بابەتی دواتر

بافڵ جەلال تاڵەبانی: هەوڵ لەپێناو کوردستان و دۆزە ڕەواکانیدا بێ پاراستنی زمانی ‏دایک، بێئەنجام دەبێت

بابەتی پەیوەندیدار
Total
0
Share