ئیدارەی یانەی مانچستەر یونایتد بڕیاریداوە ڕێگری لە کریستیانۆ ڕۆناڵدۆی پۆرتوگالی نەکات، ئەگەر بێتو یاریزانەکە بیر لە یاریکردن بۆ یانەیەکی دیکە بکاتەوە.
ڕۆژنامەی دەیلی میرەری بەریتانی بڵاویکردووەتەوە، لە گواستنەوەکانی هاوینی 2022دا یانەی مانچستەر یونایتد دەرگای بۆ کریستیانۆ واڵاکردووە، پێیانوایە ئەگەر نەیەوێت وەرزێکی دیکە لەگەڵیاندا بەردەوام بێت، باشترە ڕوو لە یانەیەکی دیکە بکات.
سەرچاوەکە نووسیویەتی، هەندێک لە کارگێڕییەکانی ڕێد دێڤڵز پێیانوایە، گواستنەوەی کریستیانۆ بەو مووچە بەرزەوە هەڵەیەکی تەکنیکی و وەرزشی بووە، هۆکارەکەش بۆ ئەوە دەگەڕێتەوە کە بەڕێوەبەرانی یونایتد بیریان لەوەکردووەتەوە پەیوەندی بە مانچستەر سیتی ڕکابەریانەوە نەکات و ئەو یانەیە لەڕووی بازرگانییەوە سوودمەند نەبێت.
مانچستەر یونایتد لەم وەرزەی خولی نایابی ئینگلتەرا پلەی چوارەمی گرتووە، بەڵام جێگیرنییە و لەلایەن یانەکانی وێستهام و ئارسیناڵەوە کێبڕکێ دەکرێت، ئەگەر بۆ وەرزی داهاتوو پێگەیەک لە خولی یانە پاڵەوانەکان مسۆگەرنەکەن، کریستیانۆ بەدوای یانەیەکی بەشدار لە خولەکەدا دەگەڕێت و دەڕوات.
