وه‌زاره‌تى دارایی تاوه‌كو كۆتایی ئه‌م هه‌فته‌یه مووچه‌ى سه‌رجەم ئه‌و شوێنانه دابه‌شده‌كات كه تاوه‌كو ئێستا مووچه‌یان پێنه‌دراوه.
سه‌رچاوه‌یه‌ك له وه‌زاره‌تى دارایی و ئابوریی هه‌رێم به تۆڕی میدیایی ئێستاى ڕاگه‌یاند، سبەینێ دووشەممە، مووچەی مانگى ڕابردووى وەزارەتی شارەوانی و گه‌شتوگوزار دابەشدەکرێت، سێشه‌ممەش مووچەى سەرۆکایەتیى هەرێم دابەشدەکرێت.
هەر بەپێی خشتە نوێكەی مووچە، ڕۆژى چوارشەممە مووچەى خانەنشینیی سەربازی و ڕۆژى پێنجشەممەش مووچەی سەربازی و خانەنشینیی مەدەنی دابەشدەکرێت، بەوەش کۆتایى دێت بە دابەشکردنى مووچەى مانگى یەک.
بەردەوامیدان بە دابەشكردنی مووچە لەكاتێكدایە كە بەغداد تا ئێستا 200 ملیار دینارەكەی مانگی یەكی نەناردووە و وەزارەتی دارایی بڕیاریدا لە داهاتی نەوتیی مانگی دوو دابەشكردنی مووچەی مانگی یەك تەواوبكات.
