ژمارەیەك شۆفێر لەسەر ڕێگای سەرەكی دهۆك خۆپیشاندانیان دژی زیادبوونی نرخی بەنزین ئەنجامدا، بەڵام لەلایەن هێزە ئەمنییەكانەوە ژمارەیەكیان دەستگیركران.
پێش نیوەرۆی ئەمڕۆ ژمارەیەك لە شۆفێرانی دهۆك خۆپیشاندانیان ئەنجامدا و بۆماوەیەك ڕێگای سەرەكی دهۆك-هەولێریان داخست.
شۆفێران ناڕەزاییان لەسەر بەرزبوونەوەی نرخی بەنزین نیشاندا و ڕایانگەیاند، داواكاری ئەوان تەنها دابەزینی نرخەكەیەتی.
ئەمەش دوای ئەوە دێت ماوەی چەند ڕۆژێكە نرخی بەنزین ڕووی لە بەرزبوونەوەی زیاتر كردووە، لیترێك بەنزینی نۆرماڵ نرخەكەی گەیشتووەتە 900 دینار و بەنزینی موحەسەنیش لە 1000 دینار بۆ لیترێك و زیاتردایە.
یەكێك لە شۆفێرانی خۆپیشاندەر بە تۆڕی میدیایی ئێستای وت، داوایان ئەوەیە بەنزین هەرزان بكرێت.
هاوكات شۆفێرێكی دیكە وتی، ژمارەیەك لە شۆفێرە خۆپیشاندەرەكان لەلایەن هێزە ئەمنییەكان دەستگیركراون، ئەوانیش لەسەر شەقام ماونەتەوە و داوای ئازادكردنیان دەكەن.
