ئەستێرەی تێنسی سەرزەویی سڕبیا و جیهان، نۆڤاک دیۆکۆڤیچ جەخت لەوە دەکاتەوە، بە هیچ شێوەیەک ژەمە ڤاکسین وەرناگرێت.
دوای دوورخستنەوەی لە پاڵەوانێتیی کراوەی ئوسترالیا و دیپۆرتکردنەوەی بۆ وڵاتەکەی، نۆڤاک دیۆکۆڤیچی 34 ساڵ ئامادەنەبوو ژەمە ڤاکسینی دژە کۆرۆنا بەکاربهێنێت، تاوەکو ئەم ساتەش ئەو کارەی نەکردووە و بڕیاریشیداوە هەرگیز نەیکات.
لە چاوپێکەوتنێکدا، “نۆلیتۆ” سەبارەت بە دوورخستنەوەی لە پاڵەوانێتییە گەورەکانی دیکە لە نموونەی ویمبڵدن و کراوەی ئەمریکا و ڕۆلاند گارۆس، بە تۆڕی “بی بی سی”ی ڕاگەیاندووە، “هەرگیز بەرهەڵستیم نەکردووە لە ڤاکسینکردنی خەڵک، بەڵام داوامکردووە مافی ئەوە بە تاکەکان بدرێت چ جۆرە چارەسەرێک، یاخود دەرمان و ماددەیەک دەخەنە جەستەی خۆیانەوە”.
هەروەها دەڵێت، “بەشداریی پاڵەوانێتییەکانی ویمبڵدن و کراوەی فەرەنسا دەکەم، بەڵام ئەگەر ناچاربکرێم ڤاکسین بەکاربهێنم، دڵنیابن ناسناوەکان دەکەمە قوربانی و بەشداریناکەم”.
