وەبەرهێنانی هەولێر هاوڵاتییانی ئاگادارکردووەتەوە، شوقە یان خانوو، لەو پڕۆژانەی نیشتەجێبوون نەکڕن کە مۆڵەتی وەبەرهێنانیان نییە.
لە هۆشدارییەکدا کە دراوەتە هاوڵاتییان و وەبەرهێنەران، بەشی مۆڵەتپێدانی بەڕێوەبەرایەتیی گشتیی وەبەرهێنانی هەولێر ڕایگەیاندووە، “هاوڵاتییان ئاگاداردەکەینەوە، شوقە یان خانوو لەو پڕۆژانەی مۆڵەتی وەبەرهێنانیان نییە نەکڕن، چونکە گرێبەستەکان هیچ بەهایەکی یاساییان نییە و ناتوانێت گەرەنتی مافی کڕیار بکات”.
لە خاڵێکی دیکەی هۆشدارینامەکەدا، وەبەرهێنانی هەولێر ڕایگەیاندووە، “ئەو وەبەرهێنەرانەی کە مۆڵەتیان پێنەدراوە، یان مۆڵەتەکانیان لەژێر وردبینیدایە، نابێت گرێبەستی فرۆشتنی یەکەی نیشتەجێبوون بکەن، یان ڕیکلامی بۆ بکەن، بە پێچەوانەوە مامەڵەکانیان بەتەواوی ڕادەگیرێت”.
هەروەها ئاگادارینامەشی داوەتە ئەو کەسانەی داوای گۆڕینی پڕۆژەکانیان کردووە لە گەشتیاری یان بازرگانییەوە بۆ نیشتەجێبوون، کە نابێت بە هیچ شێوەیەک مامەڵەی یەکەی نیشتەجێبوونیان پێوەبکرێت، تا ئەوکاتەی مۆڵەتەکانیان یەکلاییدەبێتەوە.
