پۆلیسی سلێمانى ڕایگه‌یاند، نۆ كه‌سیان له‌سه‌ر ڕووداوه‌كه‌ى شه‌وى ڕابردووى گه‌ڕه‌كى كانى سپیكه ده‌ستگیركرد.
به‌ڕێوه‌به‌رایه‌تیى پۆلیسى پارێزگاى سلێمانى له ڕاگه‌یه‌ندراوێكدا ئاماژه‌ى به‌وه كردووه، شه‌وى ڕابردوو له گه‌ڕه‌كى كانى سپیكه له شارى سلێمانى گرژى و ئاڵۆزى له‌نێوان خاوه‌ن ماركێتێك و چه‌ند كه‌سێکدا دروستبوو، به‌هۆیه‌وه چوار كه‌س به چه‌قۆ برینداربوون.
باسی له‌وه‌ش كردووه، ده‌ستبه‌جێ مه‌فره‌زه‌كانى پۆلیس گه‌یشتنه شوێنى ڕووداوه‌كه و توانرا له‌لایه‌ن بنكه‌ى پۆلیسى هه‌وارى شار و به هاوكاریى به‌شى پۆلیسى فریاكه‌وتن هه‌شت تۆمه‌تبار لەو ڕووداوەدا ده‌ستگیربكرێن و ده‌ستبگیرێت به‌سه‌ر ئۆتۆمبێلێک و دوو چه‌ك له جۆرى كڵاشینكۆف، ده‌مانچه و چه‌ند چه‌قۆیه‌كدا، دواتر له‌لایه‌ن بنكه‌ى پۆلیسى هه‌وارى شاره‌وه توانرا تۆمه‌تبارێكى دیکە له‌سه‌ر هەمان دۆسیه ده‌ستگیربكرێت .
له به‌شێكى دیكه‌ى ڕاگه‌یه‌ندراوه‌كه‌دا له ئێستادا سه‌رجه‌م تۆمه‌تباران كه ژماره‌یان نۆ كه‌سه، به بڕیارى دادوه‌ر ڕاگیراون و لێكۆڵینه‌وه له‌گه‌ڵیاندا به‌رده‌وامه .
