سەندیكای هونەرمەندان ناڕەزایی لەبارەی هێرشكردنەسەر هونەرمەند ناسر ڕەزازی نیشاندەدات و دەڵێت، “پاڵپشتیی تەواوی ئەو هونەرمەندە مەزنە دەكەین”.
سەندیكای هونەرمەندانی كوردستان ڕاگەیەندراوێكی بڵاوكردەوە و تیایدا هاتووە، ماوەیەكە چەند كەسێك بەشێوەیەكی ناشارستانی و پڕلەقین هێرشی ناڕەوا دەكەنەسەر هونەرمەند ناسری ڕەزازی.
دەشڵێت، ڕەزازیی هونەرمەند، پێشمەرگە و نیشتمانپەروەر لەپاڵ هەڵوێستە سیاسییە كوردستانییەكانیدا، هونەرمەندێكی بەئەزموون و پڕ بەخشش و داهێنانە و یەكێكە لە پارێزەران و درێژەپێدەرانی ڕەوتی گۆرانی و ئاواز و سروودە نیشتمانییە ڕەسەنەكان.
ئەنجومەنی سەندیكای هونەرمەندان وێڕای نیشاندانی پشتیوانی بۆ ئەو هونەرمەندە، داواش لە كۆمەڵانی خەڵكی كوردستان دەكات، بەهۆشیارییەوە مامەڵە لەگەڵ ئەو جۆرە وتار و بانگەشانەدا بكەن كە هونەر و هونەرمەندان دەكەنە ئامانج و هەوڵدەدەن لەڕێگەیەوە شیرازەی كۆمەڵایەتیی كۆمەڵگا بشێوێنن.
لەم ڕۆژانەدا تۆمارێكی دەنگیی ناسر ڕەزازی بڵاوكرایەوە كە تیایدا دەڵێت، من یارسانیم و موسڵمان نیم. دوابەدوای ئەو تۆمارەش لەلایەن هەندێك لە پەیڕەوكارانی ئایینی ئیسلامەوە كەوتەبەر هێرش و هەڕەشە.
ناسر محەممەد ساڵح ناسراو بە (ناسر ڕەزازی)ی هونەرمەند لە 21ی حوزەیرانی ساڵی 1955 لە شاری سنەی ڕۆژهەڵاتی كوردستان لەدایكبووە و هەر لە تەمەنی گەنجییەوە دەستی بە كاری هونەری كردووە و تائێستا بەردەوامە.
یەكێكە لە گورانیبێژەكانی كورد كە توانیویەتی بە ھەموو زاراوەكانی كوردی گۆرانی بڵێت، ئەو هونەرمەندە لە ساڵی 1990ـەوە پاش ساڵانێك ژیان لە دەرەوەی وڵات لە هەرێمی كوردستان دەژی.
