مەحمود مەشهەدانی یەكێك لە سەركردەكانی هاوپەیمانیی عەزم دەڵێت، ئیسرائیل داوای لە ئەمریكا كردووە دۆسیەی عێراق لە بەریتانیا وەربگرێتەوە و بیدات بە ئیسرائیل.
مەشهەدانی ڕایگەیاند، “لە دوو ساڵی ڕابردوودا ئەمریكا دۆسیەی عێراقی ڕادەستی بەریتانییەكان كردووە، بەڵام ئیسرائیل هەوڵدەدات قایلیبكات عێراق لە بەریتانیا وەربگرێتەوە و بیدات بە تەلئەڤیڤ”.
بەپێی وتەی ئەو سەركردەیەی هاوپەیمانیی عەزم-ی سوننەكان كە ئەندامی ئەنجومەنی نوێنەرانە و سەرۆكایەتیی یەكەم كۆبوونەوەی ئەم خوولەی ئەنجومەنەكەی كرد، تا ئێستا هەوڵەكانی ئیسرائیل سەركەوتوونەبوون و نەیتوانیوە ئەمریكا قایلبكات.
باس لەوە دەكات كە ناكۆكیی نێوان شیعەكان زیان بە وڵات دەگەیەنێت و هەموو ئەو هەوڵانەشی دراون بۆ پەرتكردنی چێوەی هەماهەنگی، شكستیانهێناوە.
“ململانێی نێوان چێوەی هەماهەنگی و ڕەوتی سەدر داڕووخانی ئەمنی بەدوای خۆیدا دەهێنێت، ئەگەر ئەوە ڕووبدات داوا لە حەشدی شەعبی دەكەین دەستوەردان بكات و جارێكی تر وڵات لە مەترسیی ئەمنی دەربازبكات”، ئەو سەركردەیەی سوننەكان وادەڵێت.
