بەڕێوەبەرایەتیی گشتیی دابەشکردنی کارەبا لە هەولێر ڕایگەیاند، لە ماوەی ڕابردوودا حەوت “بگۆڕی کارەبا”ی سەر شەقامی 120 مەتریی هەولێر دزراون و پۆلیس بەدوای تۆمەتباراندا دەگەڕێت.
تاڤگەر عومەر، بەڕێوەبەر لە بەڕێوەبەرایەتیی گشتیی دابەشکردنی کارەبای هەولێر بە تۆڕی میدیایی ئێستای ڕاگەیاند، “ئەو بگۆڕانەی کە دزراون تایبەتن بە ڕووناکیی سەرشەقامەکان و بەهۆی دزرانیانەوە چەند شوێنێک تاریکبوون”.
بە وتەی ئەو بەڕێوەبەرە، ئەوان سکاڵایان تۆمارکردووە و پۆلیس بەدوای بکەرانی ڕووداوەكەدا دەگەڕێت.
هۆکاری نەدۆزینەوەی تۆمەتباران و ئاڵۆزیی دۆسییەکە لەبەردەم پۆلیسدا ئەوەیە، کە ئەو ناوچەیەی دزییەکەی تێداکراوە کامێرای چاودێریی تێدانییە.
