ماوەی هەفتەیەکە پەتایەک بە نیشانەی سکچوون و ڕشانەوە لەناو منداڵاندا لە ئیدارەی ڕاپەڕین بڵاوبووەتەوە و تەندروستیش دەڵێت، “ڤایرۆسەکە ڕۆتایە و وەزیری تەندروستی بۆ هەمان مەبەست سەردانی ئیدارەی ڕاپەڕینی کردووە”.
تەندروستیی ڕاپەڕین لەگەڵ تەشەنەکردنی زیاتری ڤایرۆسەکەدا ڕایگەیاندووە، “ڕۆتا ڤایرۆس هۆکاری سەرەکیی بڵاوبوونەوەی پەتای سکچوون و ڕشانەوەیە لەناو منداڵان لە وەرزی زستاندا، لە هەمان کاتدا ئەگەری تووشبوونی گەورەکانیش هەیە، بەڵام بە ڕێژەی کەمتر”.
بەپێی زانیارییەکانی تەندروستیی ئیدارەی ڕاپەڕین، چۆنیەتیی بڵاوبوونەوەی ڤایرۆسەکە بەم شێوەیەیە:
ـ نەشۆردنی دەستەکان دوای چوونە توالێت.
ـ بەرکەوتنی دەست بەو شوێنانەی پیسبوون بە ڤایرۆسەکە.
ـ خواردنی پیسبوو بە ڤایرۆسەکە.
ـ کەسی تووشبوو لە ڕێی پیساییەوە ڤایرۆسەکە دەکاتە دەرەوە بەم جۆرە ڤایرۆسەکە، ژینگەی دەوروبەر پیسدەکات و خەڵکی تر تووشدەکات و ڤایرۆسەکە دەگواسترێتەوە لە ڕێگەی بەرکەوتنی ڕاستەوخۆی یەکتر.
بۆ ڕێگریکردن لە بڵاوبوونەوەی زیاتری نەخۆشییەکە پێویستە دەستەکان بە باشی بشۆردرێن دوای چوونە توالێت و پێش نان خواردن و گرنگیی زیاتر بدرێت بە پاکوخاوێنی سەرجەم ئەو کەلوپەلانەی بەکاریاندەهێنین و ئەو خواردنانەی دەیانخۆین.
نیشانەکانی پەتای ڕۆتا
سکچوونێکی زۆر.
ڕشانەوە و دڵتێکهەڵهاتن.
تایەکی کەم.
ئازاری سک.
وشکبوونەوە
بۆیە پێویستە کەسی تووشبوو شلەمەنییەکان زۆر بخواتەوە و لە کاتی هەبوونی ئەم نیشانانە سەردانی نزیکترین ناوەندی تەندروستی و نەخۆشخانە بکات.
