چالاکوانێکی خۆپیشاندانەکان لە بەغداد، شەوی ڕابردوو 6ی تشرینی دووەم، لەلایەن ژمارەیەک چەکداری نەناسراوەوە کوژرا.
حاتەم جابری، ئەفسەری پۆلیسی عێراقی ڕایگەیاند، ژمارەیەک چەکداری نەناسراو لەسەر ڕێگای محەمەد قاسم لە ناوەڕاستی بەغداد دەستڕێژی گوللـەیان لە غازی ئەبو محەمەد، چالاکوانی خۆپیشاندانەکانی بەغداد کرد لەوکاتەی ناوبراو لە گۆڕەپانی تەحریرەوە لە ڕێگادا بووە بۆ چوونەوە بۆ ماڵەکەی خۆی.
حاتەم جابری وتیشی، “لە ئاکامی دەستڕێژەکەدا، غازی ئەبو محەمەد دەستبەجێ گیانیلەدەستداوە”.
ڕاشیگەیاند، ناوبراو ئەفسەری خانەنشین بووە بە پلەی عەمید و ماوەی ساڵێکە وەک چالاکوان لە مەیدانی خۆپیشاندانەکاندا دەبینرا.
تاوەکو ئێستا لایەنە ئەمنییەکانی عێراق هیچ ڕاگەیەنراوێکیان لەمبارەیەوە بڵاونەکردووەتەوە.
