وەزیری دەرەوەی عێراق هۆشداری دەدات کە ئەگەر ئەمریکا بە کرداری باڵیۆزخانەی خۆی لە عێراق دابخات ئەوا کۆمەڵێک پێشهاتی سیاسی و ئەمنی دێتە پێشەوە کە ئەتوانێ عێراق بگەڕێنێتەوە دواوەوە.
فوئاد حسێن، وەزیری دەرەوەی عێراق لە چاوپێکەوتنێکدا لەگەڵ کەناڵی بی بی سی بەریتانی ڕایدەگەیەنێت، “دوای داخستنی باڵیۆزخانەی ئەمریکا پێناجێت دۆخی ئەمنی و سیاسی عێراق سەقامگیربێت، ئەمە وامان لێدەکات هەموو کارێک بکەین بۆ ئەوەی ئەمریکا ئەو هەنگاوە هەڵنەگرێت”.
سەبارەت بە ئێران فوئاد حسێن ڕایگەیاندووە، “ئێمە دۆستی ئێران و ئەمریکاین، هەردوو وڵاتەکە بۆ عێراق گرنگە، بەڵام هیوادارین ناکۆکی ئێران و ئەمریکا بارودۆخی عێراق ئاڵۆز نەکات”.
فوئاد حسێن وەک وەزیری دەرەوەی عێراق لەگەڵ شاندی عێراق سەردانی ئەوروپای کردووە و ئێستا لەگەڵ سەرۆکوەزیرانی عێراق و چەند بەرپرسێکی دیکە لە لەندەنی پایتەختی بەریتانیان.
فوئاد حسێن، پێشتر ڕایگەیاندبوو لە ئەگەری داخستنی باڵیۆزخانەی ئەمریکا لە عێراق پێدەچێت ئەندامانی هاوپەیمانی نێودەوڵەتی دژ بە داعش یەک بە یەک بکشێنەوە و ئەمە دەرفەت دەبێت بۆ داعش دیسانەوە هێرشبکاتەوە و باری ئەمنی عێراق تێکبچێتەوە.
